Azərbaycan ilk dəfə 4-cü yerdə!

27.09.2013 - 15:15

Avropa Voleybol Konfederasiyası (CEV) qadın klubların yeni reytinq cədvəlini açıqlayıb. Apasport.az saytının məlumatına görə, son 4 ildə rekordlarını yeniləyə-yeniləyə irəliləyən Azərbaycan tarixinin ən yüksək pilləsinə qalxıb.

Belə ki, ölkəmiz avrokuboklar üçün açıqlanan yeni siyahıda 4-cü yerdə qərarlaşıb. 1 il əvvəl Avropada 6-cı olan Azərbaycan xal hesabına 339,66-ya çatdırmaqla 2 addım irəliləyib. Ümumilikdə 55 ölkənin yer aldığı siyahıda Azərbaycan Polşa və Fransanı geridə qoyub.

Toplanan xallar isə qadın komandalarımızın son 3 mövsümdəki çıxışlarına əsasən hesablanıb. Bu 3 ildə “Rabitə” 2 dəfə Çempionlar Liqasının gümüş medalını qazanıb. “Azərreyl” və “Lokomotiv” isə “Çelenc Cup”ın qalibi adına yiyələnib. Bundan başqa, “Bakı” və elə “Lokomotiv”in özü 1 dəfə finalda oynayıb.

Bu reytinqə əsasən qadın komandalarımız 2014/2015-ci illər mövsümündə də Çempionlar Liqasında və CEV kubokunda 2 klubla təmsil olunmaq hüququ qazanıb. “Çelenc cup”da isə 1 təmsilçimiz iştirak edə bilər.

Reytinq cədvəlinin ilk 3 pilləsində dəyişiklik baş verməyib. Qitə voleybolunun nəhəngləri yenə ön sıralarda – Azərbaycandan irəlidə qərarlaşıb: Türkiyə (414,67) liderliyini, Rusiya (399,00) isə ikinciliyini qoruyub. Bu isə hər 2 ölkəyə Çempionlar Liqasında 3 komanda ilə oynamaq hüququ verib. Üçüncü olan İtaliyanın (349,67) isə təmsilçilik sayı Azərbaycan qədər olacaq.

Lakin Azərbaycan və İtaliyanın da Çempionlar Liqasına 3-cü komandası yollana bilər. Belə ki, qitənin ən nüfuzlu klub turnirinə 22 vəsiqəni 13 ölkə arasında bölən CEV daha 2 yeri “wild card”la verəcək. Bu isə yarış ərəfəsində dəqiqləşir.

Qeyd edək ki, bu il Azərbaycan Çempionlar Liqasına 3 klubla qatılsa da, onlardan “Rabitə” və “Azərreyl” həmin hüququ rəsmən qazanıb. “İqtisadçı” isə yarışda “wild card”la qüvvəsini sınayacaq.

İl	Mövsüm üçün	Yer	Xal	ÇL	CEV	Çelenc Cup	Klubların cəmi
2010	2011/2012	15	154,33	-	2	2	4
2011	2012/2013	8	224,33	1	2	2	5
2012	2013/2014	6	297,66	2	2	1	5
2013	2014/2015	4	339,66	2	2	1	5