Azərbaycan millisinin baş məşqçisi Fernandu Santuş AFFA-da media nümayəndələri ilə görüşüb.
Apasport.az xəbər verir ki, təcrübəli məşqçi jurnalistlərin suallarını cavablandırıb:
- Daha çox yerli çempionatda çıxış edən oyunçulardır. Eddi İsrafilov və ya Mahir Emreli formada deyillər deyə, dəvət almayıblar, yoxsa milliyə bugünkü gün üçün layiq bilmədiz?
- Mahir zədəlidir. Bəllidir. Ümumiyyətlə, 50 nəfərə yaxın oyunçu var idi. Onlar arasında seçim etdik. Dediyiniz oyunçular da, zədəli olduqları üçün milliyə çağırılmadı. Şahruddin, Musa, Emreli, İsmayıl İbrahimli, Anton Krivtosyuk zədəlidir. Hacıağa Hacılı da həmçinin.
- İki aya yaxındır ki, Azərbaycan millisinin çalışdırırsız. Premyer Liqa, avrokubok oyunlarımızı izlədiniz, stadionlarda oldunuz. Gələcəyə ümidlə baxmağa əsas varmı?
- Reallıqlarla barışmaq lazımdır. Biz bura gəlmişik ki, gələcək üçün komanda quraq. Həmin komanda bu yarışlarda ölkəni yaxşı təmsil etsin. İndi cəlb etdiyim oyunçular birinci dəfədir ki, mənimlə işləyəcəklər. Məşq üçün cəmi bir gün vaxt olacaq. İndi hansısa köklü dəyişikliklər etməyə gərək yoxdur. Futbolçularla birinci dəfə işləyəcəm. Onlar bizi tanıyacaq, biz də onları. Fiziki hazırlıqlarında dəyişiklik etmək imkanımız yoxdur. Çünki klublarında necə hazırlıq keçiblərsə, elə də olacaq. Gələcəkdə nələrsə dəyişəcək? Bu artıq başqa məsələdir. İndiki məqamda köklü dəyişikliklərə getməyə əsas yoxdur. Əsas hazırlıq bazası bu və millinin keçirdiyi son oyunlar olacaq. Təbii ki, rəqabətə davamlı komanda yaratmaq istəyirik ki, yüksək səviyyədə mübarizə apara bilsin, çox qol vurub, daha az qol buraxsın. Çox kompakt, istəkli, əzmkar, vətən, bayraq üçün əzmkarlıq göstərən komanda yaratmaq istəyirik. Çalışacağıq ki, güclü kollektiv yaradaq. İndiki məqamda bu çox vacibdir. Milliyə çağırılacaq hər futbolçu bizim üçün çox önəmlidir. Amma onlar heç biri bizim üçün ulduz deyil. Ulduz yalnız göydə olur.
- Millinin futbolçuları son tsikldə yaxşı formada olsalar da, effekt vermədilər. İndi isə onların hazırlıq forması daha aşağıdır. Nə gözləmək olar?
- Əsas olan komandadır. Fərdlər önəmli deyil. Gələcəkdə dəfələrlə təkrar edə bilərəm. Mənim üçün bir oyunçu digərindən önəmlidir deyə bir şey yoxdur. Hamı mənim üçün önəmlidir. Ola bilsin ki, sizin gözlədiyiniz oyunçu mənimlə olmasın. Biz hamımız burdayıq ki, Azərbaycan naminə bir şeylər edək. Fernandu Santuş və ya hansısa futbolçular üçün yox, Azərbaycan üçün buradayıq. Bizim üçün əsas olan Azərbaycan bayrağı, Azərbaycan himninə görə oynamaqdır. Bura sadəcə elə-belə gəlməmişəm.
- Millinin heyətinin bu cür açıqlanması bizim üçün də yenilikdir. Heyət daim tur bitəndən sonra açıqlanırdı. Bu gün 5-ci tur start götürür. Hansısa zədələr olarsa, alternativlər var?
- Təbii ki, alternativlər var. Avrokubok oyunlarını izlədik və qərara gəldik ki, bu gün heyəti elan edək. 50 nəfərlik siyahı var, alternativlər də var. Ölkədən kənarda oynayanlar da var, onların ölkəyə gəlişi-gedişini də nəzərə almaq lazımdır. Ola bilsin ki, xaricdə oynayanlardan kimsə zədələnsə, onları daha çox yerli çempionatda oynayanlar əvəz edəcək.
- 11 ildən sonra "Turan Tovuz"dan 2 oyunçu milliyə dəvət edilib. Bu, "Turan Tovuz"un hazırda lider olması ilə əlaqədardır?
- Azərbaycan çempionatının bütün oyunlarını izləyirik. Bu, onların lider komandada oynaması ilə əlaqədar deyil. Onları millidə görəcəyik, tanıyacağıq. Kim layiqdirsə, çağırırıq. Bu dəfə Azərbaycan çempionatının 4 komandası var ki, oradan milliyə oyunçu cəlb edilməyib. Dünən 30 oyunçu var idi, seçim etdik və 24 oyunçuluq siyahı çıxardıq. Amma 4 komandadan oyunçu yoxdur. Heç kim deyə bilməz ki, gələcək oyunlarda o klublardan futbolçu olmayacaq. Klublarda futbolçuların daha çox öz komandalarındakı çıxışına baxıb, milliyə dəvət edirik. Ola bilsin ki, bəzi oyunçular milliyə daha çox cəlb olunacaq, bəziləri olmayacaq. Hər bir futbolçuya böyük hörmətim var. Sizlərə də, həmçinin.
- Milliyə üç sağ cinah müdafiəçisi dəvət etmisiz. Onlardan hansısa sol cinahda oynayacaq, yoxsa taktiki gedişlər hazırlamısız?
- Belə variant var. Portuqaliya millisində işləyəndə də, bu cür addımlar atmışam. Mərkəz müdafiəçisinin də cinahda oynadığını görmüşük. Lazım olarsa, sağ cinah müdafiəçisini sol cinahda oynada bilərik.
- Qarşıdakı İsveç və Slovakiya oyunları haqda nə düşünürsüz? Bu matçlarda nəticə nə qədərə önəmlidir?
- Dünyada elə məşqçi yoxdur ki, qələbədən başqa nəticə istəsin. Elə komanda yaratmaq istəyirik ki, oyunçular inamlı və iddialı olsunlar. Futbol sadə oyundur. Əsas məsələ topu çərçivədən keçirməkdir. Rəqiblər barədə məlumatımız var. İstəkli, iddialı komanda qurmaq niyyətindəyik. İndiki məqamda əsas baza əlimdə olan bu futbolçulardır. Birinci dəfədir işləyəcəyik. Bilmirəm necə müdafiə olunurlar, necə hücuma keçirlər, məşqçinin dediklərini necə edirlər. Biz öz modelimizi yaratmaq istəyirik ki, öz dəsto-xəttimiz olsun.
- "Sumqayıt", "Sabah", və "Zirə"nin avrokuboklardakı çıxışını dayandırması, milliyə təsir edəcək?
- Heç bir təsiri olmayacaq. Bəzən futbolçunun da istirahətə ehtiyacı olur. Bazar ertəsi "Qarabağ" və "Zirə" oynayacaq. Həmin oyunçular dərhal milliyə gəlib məşqlərə qoşula bilməzlər. Çünki onlar bərpa olunmalıdır. "Zirə" və "Qarabağ"ın oyunçuları məşqlərdə iştirak edə bilməyəcək. Avrokuboklarda klubların mübarizəni dayandırması milliyə təsir etməyəcək. Futbolçular istəklərimi yerinə yetirməyib mübarizə aparmayacaqlarsa, bu, onların gələcəkdə milliyə dəvət olunmasına təsir göstərəcək.
- Arif Əsədov ayrıldıqdan sonra millidə yerli köməkçi məşqçi təyinatı olmayıb. Güvənmirsiz, yoxsa tapa bilmirsiz?
- Mütləq olacaq. Rəhbərliklə bu məsələ üzərində işlər aparılır. Ola bilər ki, bir neçə gün sonra, ya bir neçə həftə sonra ad açılanacaq. Heyətdə yerli məşqçinin olması lazımdır.
- Lap əvvəldə dediz ki, ulduz göydə olur. 2016-cı ildə Ronaldo göydə idi?
- Təkcə o yox, hamısı. O, dünyanın ən yaxşısıdır. Amma qələbəni tək qazanmırlar. Yalnız komanda qalib gəlir. Sizdən bir şey xahiş etmək istəyirəm. Çox istəyərdim ki, milliyə dəstək olsunlar. Azarkeşlərə müraciət edirəm. "Qarabağ"ın avrokuboklardakı oyunlarına 30 min azarkeş gəlir. Çempionat oyununa isə 300 azarkeş gəlir. "Turan Tovuz"un oyununa baxırsan, bölgələrdə azarkeş çox gəlir. Millidən bərk yapışın, inanın ki, bu gələcəyə atılmış addımdır, layihədir. Sadəcə milliyə inanın. Azarkeşlərdən xahiş edirəm, məni dəstəkləmək lazım deyil, amma millinin və oyunçuların buna ehtiyacı var. Çox istəyərdim ki, millinin oyunlarında azarkeşlər stadionu doldursunlar.
Oxşar xəbərlər
Ana səhifə
Bütün xəbərlər
Hesabım