Azərbaycan milli komandasının, “Neftçi” və “Sabah”ın veteran futbolçusu Rəşad Eyyubov Apasport.az saytına müsahibə verib.
- "Sabah"da U-19 komandasında məşqçi kimi çalışırsan. İşlərin necə gedir?
- Bəli, U-19 komandasında işləyirəm. Maraqlı işdir, futbola digər tərəfdən baxmağa başlayırsan. Təşkilati tərəfi nəzərdə tuturam. İndi yalnız öz oyununuzla deyil, bütövlükdə komandanın oyunu ilə, hər detalla maraqlanırsan. Bu mənada, məsuliyyətli və maraqlıdır.
- Standart sual olacaq, veteran futbolçulara hər zaman verilir - məşqçilik, yoxsa futbolçu olmaq çətindir?
- Məşqçi olmaq çətindir. Hər bir oyunçuya yanaşma tapmaq vacibdir. Psixologiya bəzən ön plana çıxır. Həm də, məşqçi həmişə nəticəyə görə məsuliyyət daşıyır. Hətta gənclər arasında futbolda da turnir cədvəli böyük əhəmiyyət kəsb edir.
- Karyeranızı səhhətinizlə bağlı erkən bitirməli olmuşdunuz. Bu baş verməsəydi, yəqin ki, hələ də oynayacaqdız?
- Bəli, təəssüf ki, karyeramboyu səhhətimdə problemlər var idi ki, bu da mənim potensialımı tam reallaşdırmağa imkan vermirdi. Xəstə olmadığım zamanlar öz mövqeyimdə həmişə ən yaxşılardan biri idim. Ancaq heç nəyə görə peşman deyiləm. Bütün çətinliklərə baxmayaraq, layiqli karyera qura bildiyim üçün Allaha şükür edirəm.
- Çempionat oyunlarına baxanda, öz-özünüzə deyirsən " bu dəqiqə çıxıb indi də oynayardım "? Yoxsa, səncə, indi liqa daha çox güclənib?
- Çempionatı bəyənirəm. Düşünürəm ki, daha rəqabətli olub. Amma mən də 12 komandanın və 4-5 klubun çempionluq uğrunda mübarizə apardığı dövrdə oynamışam. İndi artıq məşqçi kimi futbola baxıram və daha çox düşünürəm ki, bu dəqiqə hansı komanda zəif və ya güclü hərəkət edir. İndi taktika prizmasından baxıram.
- Ümumiyyətlə, Azərbaycan Premyer Liqası kənardan necə görünür? Səncə, liqa əvvəlki illərdən daha güclüdür, yoxsa zəifləyib?
- Futbolun problemlərindən çox uzun müddət danışmaq olar. Artıq sadəcə idman hadisəsi deyil. Futbol ölkənin sosial, iqtisadi və mədəni inkişaf səviyyəsini əks etdirir. Bu mərhələdə çoxlu sayda amillər futbolda zirvəyə qalxmağımıza mane olur, amma ümumilikdə düzgün addımlar atılır. Uşaq futbolunun əsas problemi infrastrukturdur. Tez-tez biz dəhşətli meydançalarda oynayırıq. Həyətlərdə futbol meydançaları yoxdur. Bu da öz təsirini göstərir.
- "Neftçi" və "Sabah" sabiq komandalarındır. Bu iki komandadan biri ikinci, digəri üçüncü oldu. "Sabah"ın "Qarabağ"la çempionluq mübarizəsi aparması nə qədər sürpriz idisə, yəqin ki, "Neftçi"nin üçüncü yer tutması da sənin üçün gözlənilməz oldu?
- "Sabah" çempionatın kiçik mərhələsində çempionluq uğrunda mübarizə apara bildi. Ümumilikdə, "Qarabağ" problemsiz çempion oldu. "Neftçi" mənim üçün sürpriz deyildi. Belə oyunçu seçimi ilə çempionluq uğrunda mübarizə aparmaq çətindir.
- Bu iki komanda ölkəmizi Konfans Liqasında təmsil edəcək. "Neftçi" "Jelezniçar" - "Dinamo"(Minsk) cütünün qalibi, "Sabah" isə "Makedoniya GP" - RFS cütünün qalibi ilə qarşılaşacaq. Təmsilçilərimizin mərhələ adlamaq şansı nə qədərdir?
- Əlbəttə, avrokuboklarda asan rəqib, asan oyun yoxdur. Amma məncə, həm “Neftçi”, həm də “Sabah” birinci mərhələni keçəcək.
- Vaxtı ilə formasını geyindiyiniz Azərbaycan millisi Canni De Byazinin dövründə daha çox tənqid edilir, ortada heç bir uğur yoxdur. Səncə, milliyə niyə bu durumdadır? Hər halda, son turda Estoniyanı da uda bilmədilər...
- Heyf ki, milli bu futbolçu nəsli ilə heç nəyə nail ola bilmir. Çünki heyəti həqiqətən güclüdür. Amma nəticəyə məşqçi faktorunun çox güclü təsiri var. İtalyanın yüksək hədəflərə çata bilmədiyi göz qabağındadır. Bəli, uğurlu dövrlər oldu, amma bunlar alovlanma idi. Lakin ümumilikdə düşünürəm ki, daha iddialı gənc məşqçi lazımdır.
- Sən oynadığın vaxtkı milli və indiki arasında müqayisəni necə aparardın? Tez-tez deyirlər ki, Azərbaycan millisinin heyətində tarixinin ən perspektivli uşaqları cəmləşib. Razısan bununla?
- Bəli. Razıyam ki, komandanın indi böyük perspektivləri var. Onların uğurlarına inanıram, amma yeni məşqçi ilə.
Oxşar xəbərlər
Ana səhifə
Bütün xəbərlər
Hesabım