DÇ-2022: Antirekordun bir addımlığında dayandı

29.11.2022 - 09:19

Qətərdə keçirilən dünya çempionatının qrup mərhələsində Serbiya ilə heç-heçə edən Kamerun yığması (3:3) tarixi antirekordun bir addımlığında dayanıb.

Apasport.az saytının məlumatına görə, Afrika təmsilçisi mundiallarda ardıcıl 8 məğlubiyyətin ardından meydanı yenilmədən tərk edib.

Bununla Kamerun Meksikaya məxsus 9 matçlıq məğlubiyyət seriyasını təkrarlamaqdan qurtulub. Meksika millisi 1930-1958-ci illər aralığında dünya çempionatlarında keçirdiyi ardıcıl 9 qarşılaşmada rəqiblərinə boyun əyib. Kamerun isə son qalibiyyətini DÇ-2002-də Səudiyyə Ərəbistanı (1:0) ilə görüşdə əldə edib.

Həmçinin Kamerun yığmasının futbolçusu Nikolas Nkulu da mundiallarda ardıcıl 7 məğlubiyyətin ardından bərabərlik üzü görə bilib. Nkulu hazırda bu göstəriciyə görə hamını “qabaqlayır”.

Serbiya ilə bərabərliyə baxmayaraq, Kamerun yığması dünya çempionatlarında qələbəsiz oyunlar seriyasını davam etdirir. Son 9 görüşdə qalibiyyət görməyən kamerunlular Afrika antirekorduna bir addım da yaxınlaşıb. Hazırda antirekord 13 oyunluq qələbə həsrəti ilə Tunisə (1978-2018) məxsusdur.

Komanda	Oyun sayı	Məğlubiyyət sayı
Meksika	9	1930(3), 1950(3), 1954(2), 1958(1)
Kamerun	8	2002(1), 2010(3), 2014(3), 2022(1)
İsveçrə	7	1954(1), 1962(3), 1966(3)
Salvador	6	1970(3), 1982(3)