İlk oyun günündə Premyer Liqada yerlərini qorumaq uğrunda mübarizə aparan komandalar meydan sahibi olublar ki, onlardan ABN ardıcıl ikinci oyunda böyük hesabla məğlub olub. Bərdəlilər “Qarabağ”la görüşü (0:3) də nəzərə alsaq öz meydanında yenə üç top fərqi ilə uduzublar. “İnter” isə ölkə kuboku da daxil olmaqla, ardıcıl dördüncü qələbəsini qazanıb. Nəticədə ukraynalı mütəxəssis Valentin Xodukinin çalışdırdığı komanda turnir cədvəlində 2-ci pilləyə yüksəlib. “İnter”in ötən tur lider “Olimpik”i 2:0 hesabı ilə məğlub etdiyi matçda vurduğu qolların müəllifləri olan Xaqani Məmmədovla bolqarıstanlı Petar Zlatinov yenə fərqləniblər. X. Məmmədov qolçular yarışında Azərbaycan yığmasındakı komanda yoldaşı Branimir Subaşiçi artıq iki top fərqi ilə qabaqlayır. ABN-in növbəti məğlubiyyətindən “Gənclərbirliyi” maksimum yararlanıb. Sumqayıtlılar öz meydanında keçirdiyi ardıcıl üçüncü oyunda da xal ehtiyatını artırıb. Sabir Əliyevin baş məşqçisi olduğu komanda ikinci dövrədə 8 xalı məhz bu üç görüşdə qazanıb. “Gənclərbirliyi”nə qələbəni keçmiş komandasını cəzalandıran Zaur Əsədov qazandırıb. Yarımmüdafiəçi “Masallı”nın ilk dövrədə 6:0 hesabı ilə qələbə qazandığı matçda “Gənclərbirliyi”nin qapısına vurulan qollardan birinin müəllifi olub. Budəfəki görüşdə hesab açılanadək “Masallı”nın hücumçusu Vüqar Nadirov penalti zərbəsini qeyri-dəqiq vurmaqla yadda qalıb. 21 yaşlı hücumçu “Olimpik”lə görüşü də nəzərə alsaq son üç oyunda ikinci dəfə penalti zərbəsindən istifadə edə bilmir. “Gənclərbirliyi” bu qələbə sayəsində turnir cədvəlində qərarlaşdığı sonuncu pilləni iki aylıq fasilədən sonra ABN-ə qaytarıb. Ancaq “Turan”ın qalib gəlməsi sumqayıtlıların bu komanda ilə 4 xallıq fərqinin azalmasına imkan verməyib. Tovuzlular “Qəbələ” ilə görüşdə ilk hissədə vurduqları 4 qolla qələbəni təmin ediblər. Qəbələlilər oyunun sonuna yaxın buraxdıqları iki topun əvəzini çıxmaqla böyük hesablı məğlubiyyətdən qaça biliblər. Bu, “Turan”ın tarixi ərzində “Qəbələ” üzərində qazandığı ilk qələbə olub.

3 may
“Gənclərbirliyi” – “Masallı” – 1:0
Zaur Əsədov, 35

“Turan” – “Qəbələ” – 4:2
Asəf Qədiri, 7, Vurğun Hüseynov, 34, Vüsal Qarayev, 37, Kamal Ələkbərov, 40-pen – Tornike Aptsiauri, 70, Vladimir Tsaranu, 87

ABN – “İnter” – 1:4
Xaliq Ələkbərov, 89 - Valter Quqlemon, 5, 47, Petar Zlatinov, 10, Xaqani Məmmədov, 30

Turnir cədvəli

	Klub	o	q	h	m	t	x
1	Olimpik	22	16	5	1	27-6	53
2	İnter	23	15	4	4	45-17	49
3	Neftçi	22	14	6	2	38-17	48
4	Xəzər-Lənkəran	22	13	7	2	42-15	46
5	Qəbələ	23	11	1	11	30-29	34
6	Qarabağ	22	9	6	7	23-16	33
7	Simurq	22	9	5	8	28-22	32
8	Bakı	22	7	8	7	29-24	29
9	Masallı	23	7	4	12	24-37	25
10	Standard	22	5	8	9	25-23	23
11	Karvan	22	6	4	12	21-28	22
12	Turan	23	4	5	14	18-42	17
13	Gənclərbirliyi	23	4	1	18	17-60	13
14	ABN	23	2	6	14	12-43	12

Bombardirlər: Xaqani Məmmədov (“İnter”) – 16, Branimir Subaşiç (“Neftçi”) - 14, Junivan Suares (“Olimpik”) - 11.
Qeyd edək ki, tura bu gün keçiriləcək “Qarabağ” – “Standard”, “Karvan” – “Neftçi”, “Xəzər-Lənkəran” – “Bakı” və “Simurq” – “Olimpik” oyunları ilə yekun vurulacaq.