“Neftçi” ardıcıl üç mövsüm titulsuz qalmasını rəsmiləşdirib

18.05.2008 - 11:36

Bakı. Mehman Süleymanov – APA-Sport. Mayın 17-də keçirilən üç görüşlə Azərbaycan Premyer Liqasının XXV turuna start verilib. “APA-Sport” agentliyinin məlumatına görə, ilk oyun günü meydan sahibləri üçün uğursuz olub. Ev sahibləri qələbə qazana bilməmək azmış kimi, heç qol da vura bilməyiblər. İlk oyun günündə qol vuran və qələbə qazanan yeganə komanda olan “Bakı” autsayder Bərdənin ABN klubunu darmadağın etməklə ilk dövrədə öz meydanında xal itkisinin (0:0) əvəzini çıxıb. Bununla da makedoniyalı mütəxəssis Qyoko Hacievskinin çalışdırdığı paytaxt klubu üç aylıq fasilədən sonra ilk qələbəsini qazanıb. Maraqlıdır ki, “Bakı” ikinci dövrədə hər üç qələbəsini böyük hesabla (qol buraxmadan) əldə edib. ABN maliyyə problemləri üzündən əsas futbolçularının meydana çıxmaqdan imtina etdiyi cari mövsümdə öz meydanında sonuncu görüşündə darmadağın olmaqla, Premyer Liqanı debüt mövsümündəcə tərk etməsini rəsmiləşdirib. Günün digər iki görüşündə ilk dövrədə olduğu kimi, qolsuz bərabərliklər qeydə alınıb. Ardıcıl ikinci səfər matçını (bunadək Qaxda “Simurq”la ) 0:0 hesabı ilə olan başa vuran Premyer Liqanın lideri “Olimpik” yenə xal itirsə də, tarixində ilk çempionluğa lap yaxınlaşıb. Əsgər Abdullayevin çalışdırdığı komandaya qızıl medallar uğrunda mübarizədə qalib olmaq üçün mayın 27-də “Qarabağ”la “Şəfa” stadionunda keçiriləcək son turda bir xal da kifayət edəcək. Lənkəranda son oyununda azarkeşlərini qələbə ilə sevindirə bilməyən “Xəzər-Lənkəran” isə bu xal itkisi ilə bürünc mükafatçı olmaq şansını da, demək olar, itirib. Son turda ABN-i qəbul edəcək “Neftçi” qələbə qazanmaqla 3-cü yerin sahibi olacaq. Ukraynalı mütəxəssis Anatoli Demyanenkonun çalışdırdığı komanda “Olimpik”in qazandığı bir xalla çempionluğa nəzəri şansını da itirib. Bununla da “Neftçi” son üç mövsümü titulsuz başa vurmasını rəsmiləşdirib. Qeyd edək ki, flaqman sonuncu dəfə 2005-ci ildə hazırda “Xəzər-Lənkəran”ın baş məşqçisi olan Ağasəlim Mircavadovun rəhbərliyi altında Azərbaycan çempionu olub.

17 may
ABN – Bakı – 0:4
Stanislav Baçev, 25, Eli Sisse, 49, Amiran Miciri, 54, Elnur Abdullayev, 78
“Qarabağ” – “Neftçi” – 0:0
“Xəzər-Lənkəran” – “Olimpik” – 0:0

Turnir cədvəli

	Klub	o	q	h	m	t	x
1	Olimpik	25	17	7	1	29-6	58
2	İnter	24	16	4	4	48-18	52
3	Neftçi	25	15	7	3	39-18	52
4	Xəzər-Lənkəran	25	14	9	2	43-15	51
5	Qarabağ	25	10	8	7	24-16	38
6	Qəbələ	24	11	2	11	32-31	35
7	Simurq	24	9	7	8	29-23	34
8	Bakı	25	8	10	7	33-24	34
9	Masallı	24	7	5	12	25-38	26
10	Standard	24	6	8	10	31-24	26
11	Karvan	24	6	4	14	21-31	22
12	Turan	24	4	5	15	19-45	17
13	Gənclərbirliyi	24	4	2	18	19-62	14
14	ABN	25	2	6	17	12-53	12

Bombardirlər: Xaqani Məmmədov (“İnter”) – 17, Branimir Subaşiç (“Neftçi”) - 14, Junivan Suares (“Olimpik”) - 11.
Qeyd edək ki, XXV tura bu gün keçiriləcək “Gənclərbirliyi” – “İnter”, “Qəbələ” – “Masallı”, “Karvan” – “Simurq” və “Turan” – “Standard” oyunları ilə yekun vurulacaq.