Bakı. Vüqar Xeyrullayev - APA-Sport. Salyanın “Muğan” klubu Azərbaycan yığmasının sabiq futbolçusu Yuri Muzikanı heyətinə qatmaq istəyir. “APA-Sport”un məlumatına görə, 28 yaşlı rusiyalı yarımmüdafiəçinin komandaya keçidi ilə bağlı şifahi razılıq əldə olunub. Premyer Liqanın birinci dövrəsində uğursuz çıxış etdiyindən heyətdə islahatlar aparmağı zəruri hesab edən salyanlılar milliləşən legionerlə orta sahədə yaranan boşluğu aradan qaldırmaq fikrindədir. Belə ki, kapitan Zeynal Zeynalovun komandadan kənarlaşdırılmasından sonra yarımmüdafiə xəttində boşluq yaranıb.

Kalininqrad “Baltika”sının yetirməsi olan Muzika karyerasının böyük hissəsini bu klubda keçirib. 2005-ci ilin yanvarında Azərbaycana gələn yarımmüdafiəçi “Karvan”, “İnter” və “Olimpik”in şərəfini qoruyub. 2005-ci ildə Azərbaycan millisində debüt edən Muzika yığmamızın heyətində 8 qarşılaşmaya çıxıb.

Qeyd edək ki, bu ilin yanvarında “Olimpik”ə transfer olunan Yuri ötən mövsümün ikinci dövrəsini paytaxt təmsilçisində keçirib.

• Suriya millisi Rusiya ilə yoldaşlıq oyunu keçirəcək
• "Barselona"nın qapıçısı məşqlərə başlayıb
• "Qarabağ"la matçda dubl edən futbolçu Türkiyə klubuna keçə bilər
• Liqa 1-də tur qolsuz bərabərliklə başlayıb
• "Barselona" İspaniya millisinin futbolçusunu 60 milyona ala bilər