Azərbaycanla görüşdə Almaniya yığmasının heyətində yeni futbolçular oynaya bilər. Apasport.az saytının məlumatına görə, bundestimin baş məşqçisi Yoahim Löv “Ştutqart”ın üzvləri – müdafiəçi Kristian Treş və hücumçu Kakaunun adını geniş siyahıya daxil edib. Onlar 2010-cu il dünya çempionatının seçmə mərhələsində milli komandamızla görüşdə iştirak etməyə namizəddirlər.

Növbəti rəsmi oyununu avqustun 12-də Bakıda milli komandamıza qarşı keçirəcək almanlar bu məsul matça hazırlıq məqsədilə Asiyaya yollanacaq. Orada iki yoldaşlıq görüşü keçirəcək Bundestim mayın 29-da Şanxayda Çin, iyunun 2-də Dubayda Birləşmiş Əmirliklərinin qonağı olacaq. Almaniya yığmasının bir sıra liderləri, o cümlədən “Çelsi”də çıxış edən kapitan Mihael Ballak öz klublarında oyunlara görə Asiya səfərini buraxmalı olacaq. Löv ora aparacağı son heyəti mayın 19-da açıqlayacaq.

Qeyd edək ki, Kakau əslən braziliyalı olsa da, heç vaxt öz ölkəsinin yığmasında oynamayıb. Hücumçu yaxınlarda Almaniya vətəndaşlığını alıb.