Unibank Premyer Liqasının ilk turu Bakının “İnter” klubunun baş məşqçisi Kaxaber Sxadadze üçün əlamətdar olub. Apasport.az saytının məlumatına görə, gürcüstanlı mütəxəssis Tovuzun “Turan” klubu ilə səfər matçında birdən-birə 3 yubiley qeyd edib.

“İnter”in 3:0 hesablı qələbəsi ilə başa çatan görüşdə Dmitri Kruqlovun vurduğu qol matçda sonuncu olmaqla yanaşı, ikiqat yubiley üçün yetərli olub. Bu top Sxadadzenin Azərbaycan karyerasında sevindiyi 100-cü qol olub. “Standard” və “İnter”də işlədiyi dövrlərdə gördüyü qollardan 79-u çempionat, 18-i kubok, 3-ü avrokubok matçlarına təsadüf edib.

Kruqlovun qolu həm də Sxadadzenin “İnter”lə çempionat oyunlarında sevincini yaşadığı 50-ci qol olub. Bu toplardan 47-nə ötən mövsüm şahid olan mütəxəssis cari mövsüm artıq 3 dəfə yetirmələrindən “hədiyyə” alıb. Üstəlik Tovuzda qazanılan qələbə gürcüstanlının Premyer Liqada qazandığı xalların sayının 3 rəqəmlə ifadə olunmasına səbəb olub. Bu matçadək “İnter”lə 64, “Standard”la 35 xal qazanan çalışdırıcı 100-cü yubiley xalını da raxada qoyub. O, çempionatımızdakı xallarının sayını 102-yə çatdırıb.

Vüqar XEYRULLAYEV

• Günün canlı yayımlanacaq matçları - TV AFİŞA
• Ali Koç: “Ferhat Gündoğdu istefa verməlidir” - VİDEO
• "Qalatasaray"da Osimhen ŞOKU
• Madrid təmsilçisinin yeni transferi sıradan çıxdı
• “Qarabağ” “Barselona”nın uğurunu təkrarladı