“Tvente”də 10 oyun keçirən azərbaycanlı

30.08.2010 - 17:20

Azərbaycan yığmasının futbolçusu Vaqif Cavadovun “Tvente” karyerasının birinci hissəsi başa çatıb. Apasport.az saytının məlumatına görə, həmyerlimiz bu ilin yanvarında transfer olunduğu Enshede təmsilçisi ilə ən azı bir illik ayrılıb. Hollandiyalılar 21 yaşlı hücumçumuzu “Bakı”ya bir illik icarəyə verib. Cavadovun “Tvente” macəralarına nəzər salmaq maraqlı olardı.

Bu il yanvarın 11-də “Tvente” ilə müqavilə bağlayan Cavadov bu komandada cəmi 231 gün duruş gətirdi. Hərçənd, tərəflər arasında müqavilə 3 il yarımlıq nəzərdə tutulmuşdu. Anlaşmanın cüzi bir hissəsini Hollandiyada keçirən Vaqif uğursuzluğa düçar oldu.

Onun transferində rolu olan baş məşqçi Stiv Maklaren bir neçə məşqdən sonra həmyerlimizin yerinin əvəzedici komanda olduğunu dərk etdi. Bununla eyni vaxtda hücumçu zədə də aldı.

İkinci komandadakı 2009/10 mövsümündə 3 görüşə çıxan hücumçu 1 dəfə yoldaşlıq, 2 dəfə çempionat matçında Rene Akenin etimadını qazandı. Hər 3 halda start heyətində meydana çıxan futbolçumuz vur-tut 168 dəqiqə oynadı.

Mişel Pryudomun gəlişindən sonra isə Vaqif üçün əsas komandaya düşməyə real şans yarandı. Belçikalı mütəxəssis əvvəl həvəskarlardan ibarət rəqiblərə qarşı 2 qarşılaşmada həmyerlimizə şans verdi. Sonradan daha 5 dəfə özünü göstərmək imkanı qazanan Cavadov heç nə ilə fərqlənmədi. Əsas heyətdə rəsmi matçlarda oynamayan hücumçunun yoldaşlıq görüşlərindəki göstəriciləri belədir: 7 oyun, 343 dəqiqə, 5 qol və vurulmayan penalti.

Ümumilikdə isə əvəzedici komandada və əsas heyətin yoxlama matçlarında Vaqif 10 dəfə meydana çıxdı. O, 231 günə 511 dəqiqə futbol oynayıb, 5 qol vurdu. Bu isə gündə 132,8 saniyə futbol oynamaq deməkdir.

N	Tarix	komanda	Rəqib	hesab	Oyunun statusu	Dəqiqə
1	03.02.2010	əvəzedici	“Bohum”, Almaniya	1:4	yoldaşlıq	45, start heyətində
2	19.04.2010	əvəzedici	“Sparta”	1:2	çempionat	45, start heyətində
3	26.04.2010	əvəzedici	“Vitess”	0:2	çempionat	78, start heyətində
4	18.06.2010	əsas	“Hengelos”	17:0	Yoldaşlıq	65, start heyətində (2 qol)
5	30.06.2010	əsas	“Enshede”	5:1	yoldaşlıq	31, sonradan daxil olub (1 qol)
6	01.07.2010	əsas	“De Zeuv”	11:2	Yoldaşlıq	75, start heyətində (2 qol)
7	13.07.2010	əsas	“Emmen”	2:1	Yoldaşlıq	61, start heyətində
8	17.07.2010	əsas	“Osnabryuk” (Almaniya)	1:0	Yoldaşlıq	14, sonradan daxil olub
9	23.07.2010	əsas	“Deportivo” (İspaniya)	1:1, pen 5:4	Uhrin kuboku	90, start heyətində, oyunsonrası penaltini də vura bilməyib
10	27.07.2010	əsas	“Xetafe” (İspaniya)	1:2	Yoldaşlıq	7, sonradan daxil olub