“Xəzər Lənkəran”dan avqust seriyalarına davam

07.09.2010 - 09:16

Unibank Premyer Liqasının cari mövsümündə yaranan ilk fasiləyə “Neftçi” ilə şərikli lider kimi yollanan “Xəzər Lənkəran” çempionatın avqust ayına təsadüf edən bölümünü uğurla başa vurub. Apasport.az saytının məlumatına görə, nəinki məğlub olmayan, heç qapısından qol da buraxmayan Mirça Rednikin yetirmələri klubun avqust ənənələrini davam etdiriblər.

Belə ki, sonuncu dəfə iki il əvvəl bu ayda qol buraxan “Xəzər Lənkəran” elə həmin vaxtdan uduzmur da. İlin səkkizinci ayındakı məğlubiyyətsiz oyunlar seriyasını 7-yə çatdıran cənublular 2008-ci il avqustun 10-da Yevlaxda “Karvan”a 0:1 hesabı ilə uduzduqdan sonra startda yaxşı çıxış edir.

Ümumilikdə də avqust ayı “Xəzər Lənkəran” üçün uğurlu sayıla bilər. Bu ay ərzində keçirilən 20 matçın 14-də, yəni 70 faizində qələbəyə sevinən məhz lənkəranlılar olublar.

Klubun tarixi ərzində avqusta təsadüf edən oyunlar

Mövsüm	O	Q	H	M	T	X
2004/05	3	1	1	1	3-4	4
2005/05	3	1	0	2	2-2	3
2006/07	3	3	0	0	4-1	9
2007/08	3	3	0	0	6-0	9
2008/09	3	2	0	1	5-3	6
2009/10	1	1	0	0	1-0	3
2010/11	4	3	1	0	4-0	10
Cəmi	20	14	2	4	25-10	44

Cari mövsüm avqustda toplanan 10 xal “Xəzər Lənkəran” üçün rekord sayılır. Düzdür, onlar ardıcıl 2 dəfə - 2006/07 və 2007/08 mövsümlərində 100 faizlik nəticə əldə ediblər. Lakin həmin illərdə indiki qədər çox oyun keçirilmədiyindən sentyabr 9 xalla qarşılanıb.

Qeyd edək ki, əyalət təmsilçisinin tarixi ərzində avqustda keçirdiyi bütün oyunlar ölkə çempionatı çərçivəsində olub.

Mənbə: lankaranfc.com