“Neftçi” Çempionlar Liqasının ən zəifinə uduzubmuş

08.12.2011 - 09:27

Azərbaycan çempionu “Neftçi”ni Çempionlar Liqasının II təsnifat mərhələsindən kənarlaşdıran Xorvatiya “Dinamo”su bu yarışın tarixinə düşüb. Apasport.az saytının məlumatına görə, qrup mərhələsinin son turunda Fransa “Lion”u qarşısında diz çökən (1:7) Zaqreb təmsilçisi Çempionlar Liqası tarixinin antirekordunu müəyyənləşdirib. Belə ki, gücü elə “Neftçi”yə çatan (3:0, 0:0) xorvatlar yarışın tarixi ərzində qrup mərhələsini ən zəif nəticə ilə bitirən komanda olub. Bütün oyunlarda uduzan “Dinamo” ümumilikdə 3 top vurub və 22-ni buraxıb. Bu isə top fərqinin -19 olmasını göstərir. Bununla da “Dinamo” Moskva “Spartak”ının 2002/03 mövsümündəki -17-lik top fərqini (1:18) unutdura bilib. Zaqreblilər həm də yarış tarixində qrupda ən çox qol buraxan komanda olub.