14 pillə geri və ya futbol tariximizdə 4-cü nəticə

21.12.2011 - 14:26

Azərbaycan milli komandası 2011-ci ili FİFA reytinqində 112—ci yerdə bitirib. Apasport.az saytının məlumatına görə, yığmamız ötən illə müqayisədə 14 pillə geriləyib.

2011-ci ilə planetin 98-cisi kimi daxil olan Berti Foqtsun yetirmələri il ərzində geriləsə də futbol tariximizdə heç də pis çıxış etməyiblər. Belə ki, 2008-ci ildən sonra 4-cü dəfə ili almaniyalı ilə bitirən millimiz yalnız 1 dəfə - ötən il daha yüksək mövqedə olmuşdu.

Ümumiyyətlə isə FİFA reytinqində 18-ci ilini tamamlayan yığmamız futbol tarixində yalnız 3 dəfə bundan yaxşı nəticəyə imza atıb. İlk 100-lüyə düşdüyümüz 1998, 1999 və 2010-cü illər istisna olmaqla heç vaxt indikindən – 112-ci pillədən yüksəkdə olmamışıq. Bir sözlə 2-ci yüzlükdə ən yaxşı nailiyyətimiz məhz bitməkdə olan 2011-ci ildə gerçəkləşib.