Ramiz Məmmədovun kreslosu nə vaxt laxladı?

02.04.2013 - 15:52

Ötən il sentyabrın 24-də “Qəbələ”nin baş məşqçisi təyin olunan Ramiz Məmmədovun bu postdakı fəaliyyəti 190 gün davam edib. Apasport.az saytının məlumatına görə, çalışdırıcı 6 aydan artıq müddətdə komandasını 21 oyuna çıxarıb.

Baş məşqçi vəzifəsinə 2-ci dəfə gələn Məmmədov ötən il sentyabrın 30-da AZAL-la görüşdə debüt etmişdi. Vaqif Sadıqovun yetirmələri ilə duel qolsuz heç-heçə ilə başa çatmışdı.

Lakin həmin vaxt Məmmədovu “qarşılayan” AZAL onun istefasının təməlini qoydu. Belə ki, çalışdırıcı çempionatda ardıcıl 3 məğlubiyyətdən sonra “Qəbələ”dən qovuldu. Bu seriya da AZAL-la Topaz Premyer Liqasının XXII turunun matçında başladı. Bakıda qeydə alınan 6:1 darmadağınla Məmmədovun kreslosu laxladı.

Ardından evdə “İnter”ə 1:2 hesabı ilə uduzan “Qəbələ” Bakıda “Qarabağ”a 0:1 hesabı ilə yeniləndən sonra baş məşqçisini dəyişməyi lazım bildi. Məmmədovu postundan Qurban Qurbanovun komandası azarkeşlərsiz keçirilən matçda “yola saldı”. Bu onun 21 matçda 7-ci – sonuncu məğlubiyyəti oldu. Xoşbəxt rəqəm çalışdırıcı üçün uğursuz oldu.

Çempionat	18	7	4	7	20-11	25
kubok	3	1	2	0	3-1	5
	21	8	6	7	23-12	30

İkinci dəfə postundan kənarlaşdırılan Məmmədov 2006-2010-cu illərdə bu postda daha uzun müddət duruş gətirmişdi. Həmin vaxt 4 ilə yaxın baş məşqçi olan mütəxəssis komandasını təkcə çempionatda 100 oyuna çıxarmışdı.

Çempionat	100	36	22	42	109-123	131
kubok	18	8	4	6	19-21	28
	118	44	26	48	128-144	159

Bununla da Məmmədovun 2 ayrı vaxtda “Qəbələ”ni meydana çıxardığı ümumi oyunların sayı 139-a çatdı. O, komandasını “5”ləri qoşalaşdırıb çıxdı. Belə ki, “Qarabağ”a məğlubiyyət “Qəbələ”nin Məmmədovun rəhbərliyi altında 55-ci yenilgisi idi.