TFF prezidenti millimizlə bağlı düz danışır?

10.04.2013 - 10:47

Türkiyə Futbol Federasiyasının (TFF) prezidenti Yıldırım Dəmirörən “ay-ulduzlu” komandanın baş məşqçilərinin orta fəaliyyət dövründə qabaqladıqları azsaylı ölkələrdən birinin Azərbaycan olduğunu iddia edib. Apasport.az saytı qurum başçısının nə dərəcədə haqlı olduğunu araşdırıb.

Dəmirörən bildirib ki, Türkiyə yığmasında hər çalışdırıcı orta hesabla 1,6 il işləyir. Ölkəsi üçün Almaniya yığmasını nümunə göstərən TFF rəhbəri Bundestimin hər çalışdırıcısının orta hesabla 9,5 il fəaliyyət göstərdiyini qeyd edib. O, Azərbaycan, Gürcüstan və Ermənistanda isə bu rəqəmin Türkiyədəkindən aşağı olduğunu açıqlayıb.

1992-ci ildə yaradılan yığmamız 21 ilə yaxın tarixi ərzində 18 dəfə yeni çalışdırıcıya tapşırılıb. Bu 18 təyinatdan bəziləri əvvəllər də millidə çalışmış məşqçilərlə bağlı olub. Bəzən posta gələnin fəaliyyəti bir və ya bir neçə aydan çox olmayıb. Hətta yığmanın məşqçilər korpusuna tapşırıldığı vaxtlar da olub.

Bu isə o deməkdir ki, təxminən 21 ildə 18 çalışdırıcıya ümidli olan komandamız hər 1,17 ildən bir məşqçisini dəyişib. Bu isə hər təyinat alan mütəxəssisin orta hesabla 1 il 2 ay, yəni 14 ay postunda qalmasını göstərir.

Əhməd Ələsgərov	09.1992-01.1993
Ələkbər Məmmədov	03.1993-05.1994
Məşqçilər şurası	05.1994
Ağasəlim Mircavadov	05.1994-09.1995
Kazbek Tuayev	09.1995-12.1996
Vaqif Sadıqov	01.1997-03.1999
Əhməd Ələsgərov	03.1999-12.1999
Əsgər Abdullayev	01.2000-06.2000
İqor Ponomaryov	06.2000-10.2001
Kazbek Tuayev	04.2002
Vaqif Sadıqov	04.2002-10.2002
Əsgər Abdullayev	10.2002-02.2004
Karlos Alberto Torres	02.2004-06.2005
Vaqif Sadıqov	06.2005-11.2005
Şahin Diniyev	12.2005-10.2007
Qyoko Hacıyevski	11.2007-02.2008
Nazim Süleymanov	03.2008
Berti Foqts	04.2008-...