“Komandamızın prezidenti Tale Heydərovun Yuri Syominlə görüşü hələ baş tutmayıb. Çox güman həmin görüş cümə günü reallaşdı”. Bu fikirləri apasport.az saytına açıqlamasında “Qəbələ” klubunun vitse-prezidenti Fariz Nəcəfov deyib.

Baş məşqçi postuna əsas namizədi Yuri Syomin olan Qəbələ təmsilçisi son seçimini hələ etməyib.

3 mütəxəssisin namizədliyinin gündəmdə qaldığını deyən Nəcəfovun sözlərinə görə, onların hər biri ilə görüşlər nəzərdə tutulub: “Ola bilər ki, bu, Bakıda fərqli məkanlarda olsun. Digər namizədlərin adlarını demək istəmirəm. Onlar özləri danışıqlar bitməyənə kimi adlarının çəkilməyini istəmirlər. Syominin adının artıq açıqlanmağına gəlincə, bu, gözləmədiyimiz halda Rusiya mətbuatında böyük ajiotaj doğurdu. Bəlkə də bu xəbərin ortaya çıxmağında məşqçinin özü, yaxud agenti maraqlı olub. Mən bunu dəqiq deyə bilmərəm. Hər halda, bunun bizim üçün fərqi yoxdur”.

Vitse-prezidentdən ad da olmasa, namizədin birinin hollandiyalı olduğunu öyrənə bildik.

Maraqlıdır, az öncə “Qəbələ” Futbol Akademiyasına direktor gətirilən Stenli Brand rəhbərliyə həmin həmyerlisini tövsiyə edib? Nəcəfov bildirib ki, həmin çalışdırıcı da Syomin kimi tanınmış mütəxəssisdir: “Digər namizədin hollandiyalı olduğunu deyə bilərəm. Syomin kimi tanınmış simadı. Akademiyamızın yeni kursu Hollandiya oldu. Bununla, gələcəkdə əsas komandadan başlayaraq, işlər buna uyğun yönələcək. Ancaq Hollandiya futbol sisteminin oturuşmağı üçün 3-4 il lazım olduğundan, hələ vaxtımız var”.

Mehman SÜLEYMANOV

• Dadaşov oynamadı, komandası növbəti tura yüksəldi
• “Mançester Yunayted” yeni baş məşqçi ilə anlaşıb
• “Qızıl top”un sahibi: "Bir gün vətənə qayıdıb, orada yenidən oynaya biləcəm"
• Mario Balotelli İtaliya klubunda - Rəsmi
• Rodri Ronaldodan sonra ikinci oldu