“Bakı”nın və Litva millisinin futbolçusu Deyvidas Çesnauskisin apasport.az saytına müsahibəsi

- Komandanızın “Qəbələ” ilə qarşılaşmasını ailənizlə birgə tribunadan izlədiniz. Təəssüratlarınız necədir?
- Pis oyun olmadı. Həm bizdə, həm də rəqibdə qol imkanları vardı. Amma rəqib şansını dəyərləndirərək, qalib gəldi.

- Azərbaycan kubokunu qazandığınız ötən mövsümlə müqayisədə son vaxtlar “Bakı”da daim oynamırsınız. Bunu nə ilə izah edərdiniz?
- Bu suala cavabım yoxdur. Buna baş məşqçi cavab versə yaxşıdır.

- Həlledici oyunlarda, məsələn “Xəzər Lənkəran” ölkə kubokunda 1:0 hesabı ilə qalib gəldiyiniz matçda start heyətində meydana çıxmışdınız. Sonradan nəsə problem oldu?
- Özümü yaxşı hiss edirəm. Oynamamağım baş məşqçi ilə aramızda olan məsələdir.

- “Bakı”da gələcək perspektivinizi necə görürsünüz?
- Açığı, necə olacağını hələ bilmirəm.

- Müqaviləniz bitir?
- Bəli, anlaşmam yaya kimidir.

- Az oynadığınızı nəzərə alsaq, “Bakı”dan getməyi düşünürsünüz?
- Yox. Mən qalmaq istəyirəm. Ancaq necə olacağı klubdan asılıdır.

- Sizə bu haqda bir şey deyilməyib?
- Hələ yox.

- Oynadığınız yarımmüdafiənin sağ cinahına yerli futbolçular alınır. Belə düşünmək olar ki, sizinlə böyük ehtimalla müqavilə uzadılmayacaq?
- Mən tələsməyib, rəhbərliklə söhbəti gözləyirəm. Onlarla gələcək taleyimi danışacağam. Görək, sonda necə olacaq.

- Başqa ölkələrdə variantlar var?
- Var deyəndə ki, buna sonra baxacağıq. Hazırda “Bakı”nın futbolçusuyam və heç yerə getməyə hazırlaşmıram. Rəhbərliklə danışığımda hər şeyə aydınlıq gələcək.

- Azərbaycanda qalıb, başqa klubda oynamağı istərdiniz?
- Hələlik digər variantları nəzərdən keçirmirəm. Çünki “Bakı”da çıxışımı davam etdirmək istəyirəm.

Mehman SÜLEYMANOV

• ÇL: 1/4 finalın vaxtları açıqlanıb
• Ronaldo CBF prezidentliyinə namizəd olmaqdan imtina edib
• "Aston Villa" 40 ildən sonra bunu bacardı
• Türkiyəli futbolçu “Fənər”dən ayrıla bilər
• “Yunayted”in futbolçusu zədəsini sağaldıb