“Bakı” növbəti mövsümün hazırlığını 2 ölkədə keçirəcək. Klubun vitse-prezidenti Zeynal Məmmədov apasport.az saytına açıqlamasında Türkiyə və Sloveniyada təlim-məşq toplanışında olacaqlarını bildirib.

O, yay hazırlıqları üçün sərin məkanları seçdiklərini bildirib: “Komandamız iyunun 15-17-i aralığında yığışıb, 1 həftəni Bakıda keçirəcək. Bura futbolçuların bir araya gəlməyi, tibbi müayinədən keçməyi daxildir. İlk təlim-məşq toplanışımız Türkiyənin İzmir şəhərində olacaq. İstanbuldan 1 saatlıq aralıqda gözəl bir məkanı seçmişik. Orada yaxşı otel, fiziki hazırlıq üçün yaxşı şərait var. Düşünürəm ki, orada lazımı fiziki hazırlıq keçib Bakıya qayıdacağıq”.

Məmmədovun sözlərinə görə, son illərdə yay toplanışı Sloveniyada keçirən “Bakı” onun qonşuluğunda olan Avstriyanı da gündəmdə saxlayır: “Hələ ki planda Sloveniyadır və orada güclü rəqiblər tapacağıq. 4-5 yoxlama oyunu keçirməyi nəzərdə tutmuşuq. İkinci toplanışımız iyulun 14-15-i başlayacaq və 10-12 gün davam edəcək. Sloveniyadan qayıdandan sonra son 1 həftəni Bakıda keçirib, çempionata tam hazır vəziyyətdə olmaq fikrindəyik”.

Mehman SÜLEYMANOV

• Dadaşov oynamadı, komandası növbəti tura yüksəldi
• “Mançester Yunayted” yeni baş məşqçi ilə anlaşıb
• “Qızıl top”un sahibi: "Bir gün vətənə qayıdıb, orada yenidən oynaya biləcəm"
• Mario Balotelli İtaliya klubunda - Rəsmi
• Rodri Ronaldodan sonra ikinci oldu