16-cı çempionluq – “BEŞİKTAŞ”dan!

15.05.2021 - 23:29

Türkiyə Super Liqasında 2020/21 mövsümünün çempionu müəyyənləşib.

Apasport.az saytının məlumatına görə, həm qızıl medalların, həm də digər mükafatçıların sahibləri son turda bəlli olub.

Son tur öncəsi “Beşiktaş”, “Qalatasaray” və “Fənərbaxça” qızıl medallara iddia edirdi. Axırıncı oyunlar da kritik alınıb. Kayseridə yerli “Kayserispor” üzərində əzmkar qələbə qazanan “Fənərbaxça” buna rəğmən bürünc mükafatla kifayətlənib. Enner Valensiya və Sərdar Azizin son dəqiqələrdəki qolları sayəsində “sarı-lacivərdlilər”in 2:1 hesablı qələbəsi 3-cü pillədə yer alan komandanın mövqeyini dəyişməyib.

Öz meydanında “Yeni Malatyaspor” önündə hesabda geri düşən “Qalatasaray” İbrahim Dərvişoğlu, Rayan Babel və Oğulcan Çağlayanın ikinci hissədəki qolları sayəsində 3:1 hesablı qələbə qazanıb. Lakin bu, çempionluq üçün yetərli olmayıb. Çünki İzmirdə “Göztəpə” ilə üz-üzə gələn “Beşiktaş” rəqibini 2:1 hesabı ilə məğlub edib. “Qara qartal”ın heyətində Domaqoy Vida və Raşid Qezzal fərqlənib.

“Beşiktaş”la “Qalatasaray” mövsümü eyni xalla (84) tamamlamasına baxmayaraq, müsbət top fərqi rəqibindən daha çox olan “ağ-qaralar” finişə birinci çatıb.

Beləliklə, 3 illik həsrətə son qoyan “Beşiktaş” 16-cı dəfə Türkiyə çempionluğunu qazanıb.

Bununla 2021/22 mövsümündə Türkiyəni avrokuboklarda təmsil edəcək komandalar da müəyyənləşib. “Beşiktaş” və “Qalatasaray” Çempionlar Liqasında mübarizə aparacaqsa, “Fənərbaxça” ilə 4-cü yeri tutan “Trabzonspor” yeni yaradılmış Konfrans Liqasında çıxış edəcək.

Bundan başqa, “Dənizlispor”, “Ərzurumspor” və “Ankaragücü”nün ardından “Gənclərbirliyi” də elitanı tərk edib.

1	Beşiktaş	40	26	6	8	89-44	84
2	Qalatasaray	40	26	6	8	80-36	84
3	Fənərbaxça	40	25	7	8	72-41	82
4	Trabzonspor	40	19	14	7	50-37	71
5	Sivasspor	40	16	17	7	54-43	65
6	Hatayspor	40	17	10	13	63-53	61
7	Alanyaspor	40	17	9	14	58-45	60
8	Fatih Karagümrük	40	16	12	12	64-52	60
9	Qaziantep	40	15	13	12	59-51	58
10	Göztəpə	40	13	12	15	59-59	51
11	Konyaspor	40	12	14	14	49-48	50
12	Başakşəhər	40	12	12	16	43-55	48
13	Rizəspor	40	12	12	16	53-69	48
14	Kasımpaşa	40	12	10	18	47-57	46
15	Yeni Malatyaspor	40	10	15	15	49-53	45
16	Antalyaspor	40	9	17	14	41-55	44
17	Kayserispor	40	9	14	17	35-52	41
18	Ərzurumspor	40	10	10	20	44-68	40
19	Ankaragücü	40	10	8	22	46-65	38
20	Gənclərbirliyi	40	10	8	22	44-76	38
21	Dənizlispor	40	6	10	24	38-78	28