Əliyar Ağayevdən “Panatinaikos”un oyununda qırmızı vərəqə

02.05.2022 - 11:03

Azərbaycanlı FIFA referisi Əliyar Ağayev Yunanıstanda növbəti dəfə iş başında olub.

Apasport.az saytının məlumatına görə, 35 yaşlı hakim Yunanıstan Futbol Federasiyasının dəvəti ilə Super Liqanın çempionluq qrupuna aid olan “Panatinaikos” – “Aris” oyununu idarə edib.

Pley-offun VI turuna təsadüf edən Afinadakı qarşılaşmanın taleyini 1 qol həll edib. “Panatinaikos” 28-ci dəqiqədə vurduğu yeganə topla matçdan qalib ayrılıb. Ağayev görüşün 45-ci dəqiqəsində “Aris”in hücumçusu Abunakar Kamaranı ikinci sarı vərəqə ilə meydandan qovub. Həmyerlimiz qırmızı ilə yanaşı, ev sahiblərinin 4, qonaqların isə 2 oyunçusuna sarı vərəqə göstərib.

Qeyd edək ki, “Panatinaikos” hazırda 54 xalla 3-cü, “Aris” isə 53 xalla 4-cü pillədə qərarlaşır.