[b]“Bərabərliyə razı olardım” – Maykl Onil[/b]
10.06.2017 - 22:14
[b]“Bərabərliyə razı olardım” – Maykl Onil[/b]

“Çətin oyun oldu. Yaxşı komandaya qarşı çıxış etdik”. Apasport.az saytının məlumatına görə, bunu Şimali İrlandiya yığmasının baş məşqçisi Maykl Onil deyib.

 

DÇ-2018-in seçmə mərhələsi çərçivəsində millimizin qonağı olan britaniyalılar 1:0 hesablı qalibiyyətə seviniblər. Onil matçdan sonrakı mətbuat konfransında qələbəni belə şərh edib: “Robert Prosineçki çox yaxşı komanda qurub. Əsas qol vurmaq idi ki, bunu da bacardıq. Bəzi oyunçularımız müxtəlif səbəblərdən olmasa da, lazımi nəticəni əldə edə bildik”.

 

- Conni Evansın bugünkü çıxışını necə dəyərləndirərdiz?

- Evans gözəl oyun sərgilədi. Mərkəz müdafiəçiyə xas olan oyunu göstərdi. Komandanın liderlərindən biri idi.

 

- Namiq Ələsgərova qarşı kobudluq zamanı hakim cərimə zərbəsi vermədi. Sizin fikrinizcə, orda kobudluq var idimi?

- Hakimlikdən çox razı qaldım. Həmin epizodda da müdaxilə cərimə meydanından kənarda idi.

 

- Azərbaycan millisi aşkar üstün oyun sərgilədi. Sizcə, bu, ədalətli hesab idi?

- Yaxşı oyun oldu. İlk hissədə bizim də qol vəziyyətlərimiz oldu, dəyərləndirə bilmədik. Qrupda lider Almaniyadı. Bizim məqsədimiz ikinci yeri tutmaqdı.

 

- Belə demək olarmı ki, meydana baxımlı oyun üçün yox, nəticə üçün çıxmışdınız?

- Bizim üçün hava şəraiti böyük rol oynadı. Avropa çempionatındakı heyətdən 7 nəfər yox idi. Bu üzdən bizim üçün əsas nəticə idi. Buna da nail olduq.

 

- Belfastdakı oyunla Bakıdakı matç arasında nə fərq var idi?

- Belfastda bizim bu qədər ötürmələrimiz olmamışdı. Rəqibin belə oynayacağını bilirdik. Buna görə də oyunu əks-hücumdan qurmuşduq. Bizim üçün bu gün nəticə daha vacib idi.

 

- Azərbaycan yığmasında kimi fərqləndirə bilərsiniz?

- İlk növbədə komanda şəklində qeyd etmək istərdim. Çox gözəl kapitanınız var. Riçard Almeyda, Qara Qarayev, Ramil Şeydayevi də vurğulaya bilərəm. İnanıram ki, növbəti seçmə mərhələdə daha yaxşı nəticələr əldə edəcəksiniz.

 

- Oyun bərabərə bitsəydi, hesab sizi qane edəcəkdimi?

- Xoşbəxtəm ki, qələbə qazandıq. Bərabərliyə də razı olardım. Əsas odu ki, bu nəticədən sonra qrupdan çıxmaq şansımız daha da artdı.