“Komandada problemlər çoxdu. Vaxtında məşqlər edə bilmirik, heyət oyunçularımız azdı, komandanın sponsoru yoxdu”. Apasport.az saytının məlumatına görə, bunu “Xəmsə”nin futzalçısı Qüdrət İsmayılov deyib.

Yüksək Liqanın V turu “Xəmsə”nin cari mövsümdə ilk xalını qazanması ilə əlamətdar olub. Autsayder arxada qalan 3 oyunda rəqibləri ilə başabaş mübarizə aparsa da, sonda meydanı xalsız tərk edirdi. Nəhayət, “Xəmsə” “FK.İD.Futsal”la matçda hesabda geri olmasına rəğmən dönüş edə bilib və aktivindəki sıfırı birlə əvəzləib.

Oyundan sonra komandasının yaxşılarından olan İsmayılovla bildirib ki, problemlərə baxmayaraq, çatışmazlıqları büruzə verməməyə çalışırlar: “Məşqlər etmirik, şəraitimiz yoxdu. Oyunları da adətən 5 nəfərlə keçiririk. Buna görə də ikinci hissədə yoruluruq, sona qədər oynaya bilmirik. Ehtiyatda gənc oyunçumuz var, onu zədələnən olanda məcburiyyətdən meydana buraxırıq. Qalan vaxt eyni heyətlə sona qədər mübarizə aparırıq. Qol şanslarımız da az olmur”.

O, Futzal Federasiyasının rəsmi feysbuk səhifəsinə bu qədər çətin vəziyyətdə çempionata qatılmalarının da səbəbini açıqlayıb: “Heyətimizdə yer alan uşaqların hamısı oynamağı bacarırlar. Mehdiabad uşaqlarıyıq, kənardan heç kimi dəvət etməmişik. İstəyimizə qalib gələ bilmirik. Sadəcə, şəraitimiz bir qədər yaxşılaşsa, kimsə cüzi köməklik etsə, biz də yaxşı nəticələr qazana bilərik. Necə olur-olsun, biz çempionatın sonuna qədər oynayacağıq. Bu yola çıxmışıqsa, sona qədər addımlayacağıq. Ancaq dəstək, kömək olsa, nəticələrimiz də yaxşılaşar”.