Topaz Premyer Liqasında 2018-ci ilin ən yaxşı bombardiri müəyyənləşib. Apasport.az saytının məlumatına görə, mövsümün ikinci yarısında ən çox qol vuran futbolçu İqnasio Herreradı.
“Neftçi”nin yarımmüdafiəçisi son 12 turda rəqib qapılarından 6 qol keçirib. Qış fasiləsinədək cəmi 3 dəfə fərqlənən çilili məhsuldarlığını ikiqat artırmağa nail olub.
Çempionatın bombardirləri yarışında 2-ci sırada qərarlaşan Amil Yunanov vurduğu 10 topdan 5-nə qış fasiləsindən sonra imza atıb. “Sumqayıt”ın əsas qol silahı ümumilikdə Baqali Dabodan 2, ikinci yarıda İqnasiodan 1 top geri qalır.
Bu il daha bir oyunçu 5 dəfə qol sevinci yaşayıb. “Qəbələ”nin fransalı legioneri Stiven Monroz da məhsuldarlığını artıran oyunçulardandı. Qışadək 4 dəfə fərqlənən hücumçu fasilədən sonra 1 top artıq vurub.
2018-ci ilin qolçuları arasında 4-cü sırada çempionatın autsayderi “Kəpəz”in braziliyalısı Dario Federiko qərarlaşıb. Hücumçu qışda keçdiyi komandanın heyətində 4 dəfə rəqib qapılarını dəqiq nişan alıb.
Mövsümün ən yaxşı bombardiri Baqali Dabo ikinci yarıda cəmi 3 dəfə qol sevinci yaşayıb. Fasiləyədək 9 qolu olan “Qəbələ”nin hücumçusu eyni sərrastlığı saxlaya bilməyib.
Dabodan başqa daha 7 oyunçu bu il 3 qol vurub. Bunlıar Fəhmin Muradbəyli (“Səbail”), Slavik Alxasov, Vaqif Cavadov (hər ikisi “Keşlə”), Mirabdulla Abbasov, Namiq Ələsgərov (hər ikisi “Neftçi”), Tural Axundov (“Sumqayıt”) və Aleksandr Dedovdu (“Zirə”).
Oxşar xəbərlər
Ana səhifə
Bütün xəbərlər