[b]“Qızıl top” mükafatı: kim neçə səs toplayıb?[/b]

12.01.2016 - 11:01

2015-ci ilin ən yaxşı futbolçusu seçilən Lionel Messinin topladığı səs faizi məlum olub. Apasport.az-ın FİFA-nın rəsmi saytına istinadən məlumatına görə, argentinalı ulduz futbolçu səslərin 41,33%-ni toplayaraq, “Qızıl top”a layiq görülüb.

Ümumilikdə “Qızıl top” uğrunda yarış üçün 165 yığma məşqçisi, 162 kapitanı və 171 jurnalist rəy bildirib. Bu yarışda 2-ci olan Kriştianu Ronaldo 27,76%, 3-cü yerə layiq görülən Neymar isə 7,86% səs toplayıb.

Ötən ilin ən yaxşı baş məşqçisi seçilən Luis Enrike həmyerlisi Pep Qvardiolanı qabaqlayıb. “Barselona”nın çalışdırıcısı 31,08% səs toplayıb ki, bu baxımdan əlçatmaz olub. Respondentlərin 22,97%-i isə “Bavariya”nın baş məşqçisini ən yaxşı sayıb. Bu sıralamada ilk “üçlüy”ü Çili yığmasının “sükanı arxası”nda olan Xorxe Sampaoli (9,47%) qapayıb.

İlin ən yaxşı qolu ilə bağlı səsvermədə 1 milyon 600 minə yaxın fanat iştirak edib. Ferens Puşkaş qolunun müəllifi olan braziliyalı Vendell Lira 46,7% səs toplayıb. Bu siyahıda Lionel Messi ikinci (33,3%), “Roma”nın yarımmüdafiəçisi Alessandro Florenzi (7,1%) isə üçüncü yeri tutub.

Qadınlar arasında 2015-ci ilin ən yaxşı futbolçusu adına amerikalı Karli Lloyd layiq görülüb (35,28%). Onu müvafiq olaraq almaniyalı Selia Sasiç (12,60%) və yaponiyalı Aya Miyama (9,88%) izləyiblər.

Ən yaxşı qadın məşqçisi seçilən Jill Ellis (ABŞ) rəqiblərini xeyli üstələyib. O, 42.98% səs toplayıb. Yaponiyalı Norio Sasaki (17,79%) ikinci, britaniyalı Mark Simpson (10,68%) isə üçüncü olub.

İlin simvolik komandası ilə bağlı aparılan sorğuda 26 min 478 peşəkar futbolçu iştirak edib. Həmin səsvermənin nəticəsinə görə, bu “11-lik” formalaşıb: Manuel Noyer (Almaniya / “Bavariya”); Dani Alveş (Braziliya / “Barselona”), Marselo (Braziliya / “Real”), Serxio Ramos (İspaniya / “Real”), Tiaqo Silva (Braziliya / PSJ); Andres İnyesta (İspaniya / “Barselona”), Luka Modriç (Xorvatiya / “Real”), Pol Poqba (Fransa / “Yuventus”); Kriştianu Ronaldo (Portuqaliya / “Real”), Lionel Messi (Argentina / “Barselona”), Neymar (Braziliya / “Barselona”).