Topaz Premyer Liqasının 2014/15 mövsümünün son 2 turu yalnız bürünc medallar baxımından əhəmiyyət kəsb edəcək. Apasport.az saytının məlumatına görə, XXXIV tur ilk 2 pillənin sahibini rəsmiləşdirib.

“Sumqayıt”a 1:0 hesabı ilə qalib gələn “Qarabağ” qızıl, “Qəbələ” ilə matçda 1:1 hesablı heç-heçəylə kifayətlənən “İnter” gümüş medallara sahib çıxıb. Onların hər ikisi ötən mövsümkü nəticəsini təkrarlayıb. Əgər 3-cü olan “Qəbələ” də mövqeyini qorusa, Azərbaycan futbolu tarixində ilk dəfə mükafatçı “üçlüy”ü dəyişməz qalacaq. İlk 2 pillənin dəyişməyəcəyi isə artıq rəsmiləşib. İndiyədək belə hal 1 dəfə yaşanmışdı. 2010/11 və 2011/12 mövsümündə “Neftçi” və “Xəzər Lənkəran” müvafiq olaraq, qızıl və gümüşü ardıcıl 2 dəfə qazanmışdı.

“Qarabağ”ın çempionluğuna gəlincə, ağdamlılar ümumilikdə 3-cü, ardıcıl 2-ci dəfə qızıl qazanıb. Ötən mövsümdə çempion olan komanda ardıcıl 2 dəfə bunu bacaran 4-cü komandadı. Bunadək 2 dəfə “Neftçi” (1995/96, 1996/97 və 2003/04, 2004/05), hərəyə 1 dəfə “Kəpəz” (1997/98, 1998/99) və “Şəmkir” (1999/2000, 2000/01) bunu bacarmışdı. Ardıcıl 3 çempionluq isə yalnız “Neftçi”yə (2010/11, 2011/12, 2012/13) nəsib olub.

“Qarabağ” 3 çempionluqla “Kəpəz”ə çatıb. 8 qızılı olan “Neftçi” isə mütləq rekordçudu. Bu 3 komandadan başqa, “Şəmkir”, “Bakı” və “İnter” hərəyə 2, “Turan”la “Xəzər Lənkəran” hərəyə 1 dəfə Azərbaycanın ən yaxşısı olub.

Hesabında 2 gümüş və 3 bürünc də olan “Qarabağ” 8-ci mükafatını əldə edib. Medal sayında 2-ci olan ağdamlılar yalnız “Neftçi”dən geri qalır. Bakılılar izləyicisini təxminən 2 dəfə üstələyir – 15 medal.

Mükafat sayında 3-cü olan “İnter” 7-ci dəfə “üçlüy”ə düşüb. 2 qızıl, 2 bürüncü olan “bankirlər” 3-cü dəfə gümüş əldə edib. Gümüş sayında yalnız “Xəzər Lənkəran” daha çox ikincilik qazanıb - 4 dəfə.

“İnter” ardıcıl 4-cü dəfə “üçlük”də yer alıb. İki bürüncdən sonra bakılılar 2 gümüş qazanıb. Ardıcıl medal sayında rekord “Neftçi”nindi. 1998/99 mövsümündən 2006/07 mövsümü də daxil olmaqla, hər çempionatda “ağ-qaralar” medal qazanıb. “Kəpəz”lə “Şəmkir” də ardıcıl 4 mövsüm medal qazana bilib. “Qarabağ” isə ardıcıl mükafat sayını bu il 3-ə çatdırdı.

“Qarabağ”ın baş məşqçisi Qurban Qurbanov bu postda 2-ci qızılını qazanıb. O, çempionluq sayında Ağasəlim Mircavadov (5), Kazbek Tuayev (4), Mehman Allahverdiyev və Böyükağa Hacıyevdən (hər ikisi 3) sonra 5-cidi. Digərləri isə 1 dəfə qızıl medal əldə edib.

Ümumilikdə isə Qurbanov 6-cı dəfə Azərbaycan çempionu olub. O, futbolçu kimi 1993/94 mövsümündə “Turan”, 1996/97, 2003/04 və 2004/05 mövsümlərində “Neftçi” ilə qızıla yiyələnib. Futbolçu kimi ölkə rekordu isə 11 qat çempion Mahmud Qurbanova məxsusdu.

Lakin gümüş və 2 bürüncü də olan Qurbanov ümumi medal sayında Allahverdiyevə (3 qızıl, 1 gümüş, 2 bürünc) çatıb. Onlar yalnız Mircavadovdan geri qalır – 5 qızıl, 1 gümüş, 1 bürünc.

5-ci medalını qazanan Kaxaber Sxadadzenin hesabında 1 qızıl, 2 gümüş, 2 bürünc var. Legionerlər arasında rekordçu olan mütəxəssis ümumi sıralamada 4-cü yerə şərikdi. Belə ki, Tuayevin də 5 medalı var – 4 qızıl          , 1 gümüş.

• “Trabzonspor”un yeni baş məşqçisi bəlli olub
• Aksel Vitse Belçika millisindəki karyerasını başa vurub
• Almaniya millisinin heyəti açıqlandı: SANE DƏVƏT ALMAYIB
• Premyer Liqa klubunda yeni müqavilə - RƏSMİ
• "Beşiktaş" – "Marsel" matçı bu kanalda - TV AFİŞA