Bakı “İnter”i Avropa Liqasının I təsnifat mərhələsində Albaniya təmsilçisi “Laçi” ilə qarşılaşacaq. Apasport.az saytının məlumatına görə, Laçi şəhərinin eyniadlı komandasının əsası 1960-cı ildə qoyulub.
“Bankirlər”in 55 yaşlı rəqibi bu vaxta qədər 2 dəfə (2012-13, 2014-15) Albaniya Kubokunun sahibi olub. “Ağ-qaralı” formanı geyinən “Laçi” 2005-ci ildə Superliqanı tərk edib. Komanda bir də 4 ildən sonra, yəni 2009-cu ildə yüksək dəstəyə qayıdıb.
“Laçi” ilk dəfə avrokuboklarda 2010-11 mövsümündə çıxış edib. Birinci cəhddə Belarus “Dnepr”i ilə qarşılaşan albanlar iki oyunun nəticəsinə görə 2:8 hesabı ilə uduzublar.
Ötən mövsüm isə ilk mərhələdə Sloveniya “Rudar”ını mübarizədən kənarlaşdıran “Laçi” daha sonra Ukrayna təmsilçisi “Zarya” ilə üz-üzə gəlib. Hər iki görüşdə məğlub olan (0:3, 1:2) “Laçi” bu dəfə özü mübarizəni dayandırmalı olub.
Klubun prezidenti Paşk Laska, baş məşqçisi isə Armando Kunqudu. Yerli mütəxəssis olan Kunqu 2014-cü ildən “Laçi”ni çalışdırır.
Komandanın əsasını yerli futbolçular təşkil edir. Nigeriyalı Sequn Adeniyi və kosovolu Arqyend Mustafadan başqa heyətin bütün üzvləri albandılar.
“İnter”in rəqibi ev oyunlarını 4 min 500 nəfərlik “Laçi” stadionunda keçirir.
Oxşar xəbərlər
Ana səhifə
Bütün xəbərlər