2015/16 mövsümünün hazırlıqlarını Türkiyədə davam etdirən “Qəbələ” növbəti transferini gerçəkləşdirib. Apasport.az-ın klubun rəsmi saytına istinadən məlumatına görə, Andrey Popoviç, Məhəmməd Mirzəbəyov, Arif Daşdəmirov, Asif Məmmədov, Samir Zərgərov və Vitali Vernidubu heyətinə qatan “qırmızı-qaralar” daha bir legioner transferini reallaşdırıb.
Premyer Liqanın bürünc mükafatçısı Estoniya millisinin üzvü Sergey Zenyovla 2 illik müqavilə imzalayıb. 26 yaşlı hücumçu yeni klubu ilə münasibətlərini Ərzurumda rəsmiləşdirib.
Zenyov artıq ilkin təəssüratlarını da bölüşüb: "Qəbələ"yə keçid karyeramda yeni səhifə, yeni hədəflər deməkdi. Yeni komandam Avropa Liqasında çıxış edəcək və Azərbaycan Premyer Liqasında çempionluq uğrunda mübarizə aparacaq. Hədəfləri olan komandada oynamaq hər futbolçunun arzusudu. Mən də "Qəbələ"yə keçdiyimə görə məmnunam. Bu komanda haqda qiyabi məlumatlara malikəm. İnternet vasitəsilə komandanı, klubun yerləşdiyi şəhəri, şəraiti və bazanı araşdırmışam. Heyətdə daha öncə rəqib kimi qarşılaşdığım futbolçular var. Bu mənada Qay, Vernidub və Bezotosnını tanıyıram. Onların oyununa yaxşı bələdəm. Daha öncə "Karpatı"nın heyətində Avropa Liqasında çıxış etmişəm. Məqsədim təcrübəmdən istifadə edərək komandama həm Avropa Liqasında, həm də ölkə çempionatında kömək olmaqdı".
Qeyd edək ki, Sergey Zenyov son klubu Rusiyanın “Torpedo” (Moskva) komandası olub. O, bu kluba 2015-ci ilin əvvəlində keçib. Vətənində “Pyarnu” (2006) və TFMK (2006-08) klublarında çıxış edən Zenyov 2008-ci ildən legioner həyatı yaşayır. 2008-14-cü illərdə “Karpatı”nın (Ukrayna) şərəfini qoruyan hücumçu ötən il İngiltərənin “Blekpul” komandasında çıxış edib. 2008-ci ilə qədər U-21-in üzvü olan Sergey 7 ildi Estoniyanın əsas yığmasının şərəfini qoruyur.
O, millidə 45 oyunda 11 qol vurub. AVRO-2016-nın seçmə mərhələsinin iyunun 14-də baş tutan son qarşılaşmasında dubla imza atan hücumçu San-Marino üzərində qələbədə (2:0) əsas pay sahibi olub.
Oxşar xəbərlər
Ana səhifə
Bütün xəbərlər