[b]Millimizin yeni Əsasnamə ilə Bolqarıstan arzusu[/b]

16.03.2015 - 09:55

Sabah 17 yaşadək futbolçular arasında Avropa çempionatının elit-raundunun II qrupunun görüşlərinə start veriləcək. Apasport.az saytının məlumatına görə, oyunları Bakıda keçiriləcək qrupda Azərbaycan, Portuqaliya, Serbiya və Xorvatiya yığmaları mübarizəyə başlayacaq.

Qarşılaşmaları “Bakcell Arena”, İsmət Qayıbov adına Bakıxanov qəsəbə stadionu və “Bakı” klubunun təlim-məşq bazasında baş tutacaq turnirində ilk görüş Portuqaliya və Serbiya milliləri arasında olacaq. Mirbağır İsayevin baş məşqçisi olduğu yığmamız isə mərhələyə Xorvatiya ilə oyunla başlayacaq.

Bütün qarşılaşmalarını “Bakcell Arena”da keçirəcək komandamız II turda Portuqaliya ilə üz-üzə gələcək. Sonuncu oyun günündə isə futbolçularımız Serbiya ilə görüşəcək.

Bu mərhələnin evdə keçirilməsi yığmamız üçün tarix yazmaq imkanı qazanıb. İndiyədək heç vaxt final mərhələsinə yüksəlməyən komandamız Bolqarıstanda oynamaq arzusuna yeni Əsasnamə də kömək edə bilər.

Məsələ ondadı ki, bu mövsümdən final mərhələsində 8 deyil, 16 yığmanın iştirakından yararlananlardan birinin də millimizin olması mümkündü. Çünki elit-raundu əvvəlki illərdə yalnız qrup qalibi adlayırdısa, bu dəfə 2-ci yerin də buna nail olmasına imkan verilib.

Düzdü, qrup qaliblərinin birbaşa yüksəldiyi həlledici turnirə 2-ci pillə sahiblərindən hamısı çıxmayacaq. 8 qrupda 2-ci olanlardan daha yaxşı nəticəyə malik 7-si xoşbəxtlər sırasına düşəcək. Bu 8 komandanın nəticələri müqayisə olunarkən onların 1-ci və 3-cü yerlə oyunları nəzərə alınacaq.

Bakıdakı qrupun matçlarını Kipr, Şotlandiya və Avstriyadan olan hakimlər idarə edəcək. Millimizin rəqiblərinin görüşlərində isə azərbaycanlı hakimlər də iş başında olacaq. Belə ki, Rəhim Həsənov dördüncü, Namiq Hüseynov isə yan xətt hakimi kimi 3 oyuna çıxacaq.

Avropa çempionatının elit-raundu

II qrup

17 mart

13:00. Portuqaliya – Serbiya

Hakimlər: Endryu Dallas, Qren Stüart (hər ikisi Şotlandiya), Namiq Hüseynov. Rəhim Həsənov (hər ikisi Azərbaycan)

Hakim-inspektor: Tomaş Mikulski (Polşa)

UEFA nümayəndəsi: Tomaş Mikulski (Polşa)

Bakı. İsmət Qayıbov adına Bakıxanov qəsəbə stadionu

16:30. Xorvatiya – Azərbaycan

Hakimlər: Dimitrios Massias, İoannis Lazardu (hər ikisi Kipr), Andreas Heydenrayx, Dominik Ouşan (hər ikisi Avstriya)

Hakim-inspektor: Xuan Antonio Fernandes Mann (İspaniya)

UEFA nümayəndəsi: Girogi Pirtsxalava (Gürcüstan)