Onuncu cəhd

18.03.2015 - 16:55

Bu gün start götürəcək seçmə mərhələ ilə Azərbaycan yığması 10-cu Avropa çempionatında mübarizəyə başlayacaq. Apasport.az saytının məlumatına görə, 1996-cı ildən start götürən qitə birinciliklərinin daimi iştirakçısı olan yığmamız 3 dəfə final mərhələsinədək irəliləyibsə, 6 dəfə seçmə oyunlar səddini aşa bilməyib.

Onuncu cəhdi Bakıda – Ukrayna, Danimarka və Belçika ilə duellərdə gerçəkləşəcək millimiz bu yarışlarda indiyədək 37 oyun keçirib. Hesabında 15 qələbəsi olan yığmamız 8 heç-heçə edib və 14 dəfə meydanı başıaşağı tərk edib. 128 qol vurub, 130-nu buraxan futzalçılarımız top fərqini doğma meydanda yaxşılaşdırmağa çalışacaq.

AVRO-2012-yə də vəsiqəni evdə qazanan milli tarixində 2-ci dəfə seçmə oyunlarını Bakıda keçirir. 4 il əvvəl 2-ci yerlə final mərhələsinə vəsiqə əldə edən yığmamızı bu dəfə yalnız 1-ci yer qane edir. Çünki 2-ci yer sahibləri pley-offda çıxış etməli olacaq.

Qeyd edək ki, millimiz bu gün Avropa çempionatlarındakı 38-ci görüşündə Belçika ilə, sabah Danimarkayla, 40-cı yubiley matçında əsas rəqibi Ukrayna ilə görüşəcək.

AÇ-lərdə

N	il	bizimkilər	O	Q	H	M	TOP	X	KOMA NDA	YER
1	1996	seçmə mərhələ (Hollandiya), 1-ci qrup	5	1	0	4	12-25	3	6	VI
2	1999	seçmə mərhələ (Belçika), 2-ci qrup	2	0	2	0	4-4	2	3	II
3	2001	seçmə mərhələ (Macarıstan), C qrupu	3	1	1	1	12-8	4	4	III
4	2003	seçmə mərhələ (Portuqaliya), 5-ci qrup	3	1	0	2	5-9	3	4	III
5	2005	seçmə mərhələ (Serbiya), 5-ci qrup	3	1	0	2	8-10	3	4	III
6	2007	seçmə mərhələ (Hollandiya). D qrupu	3	1	2	0	17-12	5	4	II
7	2010	seçmə mərhələ (Portuqaliya), VI qrup	3	2	1	0	12-7	7	4	II
		final mərhələsi (Macarıstan)	5	2	2	1	18-13	8	12	IV
8	2012	seçmə mərhələ (Azərbaycan) I qrup	3	2	0	1	13-13	6	4	II
		final mərhələsi (Xorvatiya), D qrupu	2	0	0	2	9-13	0	3	III
9	2014	Seçmə mərhələ (Slovakiya), B qrupu	3	3	0	0	11-3	9	4	I
		final mərhələsi (Belçika), C qrupu	2	1	0	1	7-13	3	3	III
		Cəmi	37	15	8	14	128-130	53