Topaz Premyer Liqasında yaranan fasilədən istifadə edən “Neftçi” yoxlama oyunu keçirib. Apasport.az saytının məlumatına görə, Arif Əsədovun yetirmələri I divizion təmsilçisi “Qaradağ Lökbatan”la qarşılaşıb.
İsmət Qayıbov adına Bakıxanov qəsəbə stadionunda baş tutan görüş “Neftçi”nin 4:1 hesablı qələbəsi ilə nəticələnib. “Ağ-qaralar”ın qollarından Ruslan Qurbanov və Nikolas Kanales vurub. Onların hər ikisi dubla imza atıb.
Əsədovun daha çox gənc futbolçulara şans verdiyi oyunda “Neftçi” 2 penaltini də qaçırıb. Belə ki, Qurbanov və Kanales hərəyə bir dəfə penalti zərbəsindən yararlana bilməyiblər.