AFFA Hakimlər Komitəsinin sədri Xaqani Məmmədovun apasport.az saytına müsahibəsi

- Topaz Premyer Liqasının XXIV turunda keçirilən “Neftçi” – “Qəbələ” (1:0) matçından sonra qonaqların baş məşqçisi Roman Qriqorçuk hakimliyi günahlandırmışdı. Onun ən çox narazı qaldığı məqam “Neftçi”nin vurduğu qol epizodundan əvvəl təyin olunan cərimə zərbəsi idi...

- Həmin epizodda hakim tam haqlı qərar vermişdi. Hələ “Qəbələ”nin futbolçusuna sarı vərəqə də göstərməli idi. Yəni, o vəziyyətə görə narazılıq etmək yersizdi.

- “Neftçi” isə 63-cü dəqiqədə meydandan qovulan yarımmüdafiəçi Emin Mahmudovun ikinci sarı vərəqəsinin ləğvi üçün müraciət edib. Qarşılaşmanın hakim-inspektoru və komitə sədri kimi, İnqilab Məmmədovun bu qərarını necə dəyərləndirərdiniz?

- Fikir vermisinizsə, Emin həmin epizodda ayağını arxaya çəkir. Hakimin rakursundan elə görünür ki, rəqibini vurur, sonra ayağını çəkir. Lakin təkrardan görünür ki, Emin Dabonu vurmur. Yəni, hakimin cərimə zərbəsi təyin etməsi və ikinci sarı vərəqəni göstərməsi yanlış qərar idi.

- Razısınız ki, həmin epizodda Baqali Dabo referini ustalıqla altdatmağı bacardı?

- Doğrudu. Ümumiyyətlə, “Qəbələ”də hakimi peşəkarlıqla aldatmağı bacaran bir neçə futbolçu var. Biri elə Filip Ozobiç.

- “Sumqayıt”ın baş məşqçisi Samir Abasov da son vaxtlar aqressivləşib. Həm ölkə kubokunda “Keşlə” (0:1) ilə ilk oyunda, həm də çempionatın ötən turunda “Qarabağ”la (0:1) matçda kəskin etirazla yadda qalmışdı...

- Abasov ilboyu narazılıq edir. Görün, neçə dəfə texniki zonadan uzaqlaşdırılıb. Samir güclü, perspektivli məşqçi və yaxşı insandı. Amma bu adamı meydanda tanımaq olmur, emosiyalarını cilovlaya bilmir. Onun bu hərəkəti artıq futbolçularına da keçib. Fikir verirsinizsə, son matçlarda “Sumqayıt”da eniş baş verir. Bu da onunla bağlıdı ki, eyni anda həm kubok, həm də çempionatda mübarizə aparırdılar və ehtiyat oyunçular skamyası qısadı. Eyni oyunçularla 2-3 gündən bir futbol oynamaq çətindi. Bu da zəif çıxışa gətirib çıxarır. Abasovun “Qarabağ”la matçdan sonrakı hərəkətləri heç bir çərçivəyə sığmır. Onun tələb etdiyi vəziyyətdə hakim tamamilə haqlı idi. Rəqibin qapıçısına sarı vərəqə verilməsini istəyirdi. Axı nə əsasla? Hücum qapıçıya qarşı edilib. Həmin anda qolkiper nə edib ki, ona sarı vərəqə verilsin?

- Ölkə kubokunda yarımfinal mərhələsinin ilk görüşündən sonra Samir Abasov bildirmişdi ki, “Keşlə”nin bir neçə oyunçusu limitdə olduğu üçün hakim qəsdən onlara sarı vərəqə göstərmədi. Üstəlik, bunu “yuxarıdan” edilmiş tapşırıqla əsaslandırmışdı...

- Bu, absurd fikirdi. Hansı oyunçunun neçə sarı vərəqəsi olduğunu heç bir hakim və Hakimlər Komitəsi bilmir. Buna PFL-in texniki şöbəsi baxır. Hakim kimin nə qədər vərəqəsi olduğunu bilmir, meydandakı qayda pozuntusuna görə qərar verir. O ki qaldı tapşırığa, sözü deyəndə diqqət yetirmək lazımdı. Kimin nəyinə lazımdı, tapşırsın ki, filan futbolçuya sarı və ya qırmızı vərəqə göstərin? Hansısa hakim səhvən vərəqə verirsə və ya vermirsə, o demək deyil ki, ona bu tapşırılıb. Hesab edirəm ki, bu, ucuz söhbətdi.

- Ümumiyyətlə, son vaxtlar baş məşqçilər kəskin etirazlarla diqqət çəkirlər. Həqiqətən də, hakimlər qənaətbəxş idarəçilik etmirlər, yoxsa məşqçilər uğursuzluğa bu yolla səbəb axtarırlar?

- Səbəbini hamı çox gözəl bilir. Bütün bunlar niyə mövsümün sonlarında baş verir? Çünki mövsümün əvvəlində sponsorlara, prezidentlərə “yağlı” vədlər verilir. Mövsümün sonlarında vəziyyət gərginləşdikcə, nəticə qazanılmayınca, başlayırlar hədəf axtarmağa. Hədəf də hakimdi. Bəs filankəs qoymadı qələbə qazanıb Avropaya düşək. Hansısa oyunda da hakimin təsadüfi bir səhvi olsa, bunu əllərində “kozır” edirlər. Günahı özlərində axtarmalıdılar, hakimlikdə deyil.

- Bu təzyiqlər hakimlərə mənfi mənada təsir göstərmir? Və həmin komandanın növbəti matçında daha ehtiyatlı idarəçilik etmələrinə səbəb olmur?

- Xeyr, qətiyyən. 5-6 il əvvəl sizinlə razılaşardım. Amma indi hakimlər də “bişiblər”, peşəkarlaşıblar. Hansısa məşqçinin hoppanıb-düşmələri hakim üçün əhəmiyyətli deyil. Lazım gələndə texniki zonadan uzaqlaşdırırlar. Məşqçilər əsəblərinə hakim olmalıdılar.

- Son olaraq UEFA Gənclər Liqasının yarımfinal mərhələsində “Mançester Siti” – “Barselona” (4:5) matçının baş hakimi Əliyar Ağayevin idarəçiliyi ilə bağlı fikirlərinizi bildirərdiniz...

- Həmin matçın hakim-inspektoru UEFA Hakimlər Komitəsinin rəhbəri Pyerluici Kollina idi. Əvvəlcə hakim-inspektor fransız təyin olunmuşdu. Lakin sonradan Kollina özü olmaq istədi. Əliyar Kollinanın nəzarətindədi. Ona elə-belə yanaşmır. Ötən il Əliyarın I kateqoriyaya keçməsi təklif olunanda Kollina daha bir il baxmaq istədiyini demişdi. Artıq həmin bir il keçib. Bunun üçün indi yayı gözləyək.

Ruslan SADIQOV