“Son iki matçda son güc sərf etdik. Ardıcıl həm “Qarabağ”, həm də “Hammarbü” ilə ağır oyunlar keçirdik”. Apasport.az saytının məlumatına görə, bunu “Höteborq”un sağ cinah müdafiəçisi Emil Salomonsson deyib.

Avropa Liqasının pley-off mərhələsi çərçivəsində bu gün “Qarabağ”a qarşı keçiriləcək səfər matçını dəyərləndirən 27 yaşlı futbolçu Ağdam klubunun oyununu tərifləyib. Salomonsson, həmçinin fərqli üslubda çıxış edən komandalarla tez-tez qarşılaşmağın çətin olduğunu da vurğulayıb: “Qarabağ” ötən həftə bizə qarşı “tiki-taka” sistemini tətbiq etdi. Bu komanda oyun üslubuna görə, “Barselona”ya çox bənzəyir. Bundan bir neçə gün sonra isə “Hammarbü” ilə qarşılaşdıq. Onlar isə uzun topla oynamağı sevirlər. Heç həndbol və ya hokkey növlərində bu qədər fərqliliklər olmur”.

2011-ci ildən “Höteborq”un formasını geyinən İsveç millisinin üzvü bu gün adıçəkilən klubun heyətində 199-cu matçına çıxacaq. Salomonsson yubiley görüşünə yüksək əhval-ruhiyyədə yollanmaq arzusunda olduğunu söyləyib: “İnanıram ki, 200-cü oyuna Avropa Liqasının qrupunda yer almaq sevinci ilə çıxaram. Yubiley görüşüm “Helsinborq”a qarşı olacaq. Amma indi yalnız “Qarabağ”ı düşünürəm. Ümid edirəm ki, yubiley oyunu öncəsi Avroliqanın qrupuna düşmək hədiyyəsi alaram”.

Qeyd edək ki, Tofiq Bəhramov adına Respublika stadionunda keçiriləcək “Qarabağ” – “Höteborq” görüşü saat 20:30-da start götürəcək. Bu komandalar arasında “Qamla Ullevi” stadionunda baş tutmuş matçda meydan sahibləri 1:0 hesablı qələbə qazanıblar.