“Çelsi” Çempionlar Liqasının “Qarabağ”la keçiriləcək səfər matçında dəstəksiz qalmaq istəmir. Apasport.az saytının yerli mətbuata istinadən məlumatına görə, London klubu bu məqsədlə fanatlarına müraciət edib.
Müraciətdə noyabrın 22-də qrup mərhələsinin V turu çərçivəsində keçiriləcək görüşün biletlərinin münasib qiymətə olması xüsusi vurğulanıb. “Zadəganlar” ən ucuz biletin 87 penni (2 manat), ən bahalı biletin isə 22 funt-sterlinq (50 manat) olmasını fanatları üçün yaxşı şans hesab edir.
Maraqlıdı ki, ingilislər hətta 22 funt-sterlinq dəyərindəki biletləri də azarkeşlər üçün göydəndüşmə qiymət sayırlar. Bu üzdən İngiltərə çempionu Bakıya çox sayda fanatının gələcəyinə ümid edir.
Qeyd edək ki, bu komandalar arasında sentyabrın 12-də “Stemford Bric”də keçirilən ilk tur matçında meydan sahibləri 6:0 hesablı qələbə qazanıblar.