“Neftçi”nin baş məşqçisi Böyükağa Ağayev baxışda olan daha bir futbolçu haqda yekun qərarını verib. Apasport.az saytının məlumatına görə, flaqmanın çalışdırıcısı Taavi Rahnın da oyununu bəyənib.

“Olimpik-Şüvəlan”la yoxlama görüşündə (2:1) qol vuran, “Kocaelispor” və “Ərciyəsspor”la qarşılaşmalarda da özünü yaxşı tərəfdən göstərməyi bacaran estoniyalı müdafiəçi ilə yaxın günlərdə müqavilə imzalanacaq.

Xatırladaq ki, Ağayev sınaqdan keçirdiyi digər futbolçu – rumıniyalı yarımmüdafiəçi Leonard Naydinin də oyunundan razı qalmışdı. Taavi Rahna gəlincə, 28 yaşlı futbolçunun sonuncu klubu “Ekranas” (Latviya) olub. 1999-cu ildə “Lelle” (Estoniya), 2000-2001-ci illərdə “Viljandi” (Tulevik, Estoniya), 2002-2003-cü illərdə “Flora” (Tallin, Estoniya), 2003-2006-cı illərdə “Volın” (Lutsk, Ukrayna) klublarında çıxış edən müdafiəçi Estoniya yığma komandasının heyətində 45 oyunda meydana çıxıb.