Serbiyanın paytaxtı Belqradda güləş üzrə Fərdi Dünya Kuboku davam edir.

Apasport.az saytının məlumatına görə, bu gün 60, 63, 82, 97 və 130 kq-da çıxış edən yunan-Roma güləşçiləri mübarizəyə qoşulub.

Böyüklər arasında ilk yarışına çıxan Nihat Məmmədli (60 kq) dünya ikincisi və Avropa çempionu olmuş Moldova güləşçisinə uduzub.

Taleh Məmmədov (63 kq) ilk görüşdə Ukrayna güləşçisinə rahat qalib gəlib. Ancaq növbəti mərhələdə rusiyalı güləşçi keçilməz olub. Rəqib finala yüksəldiyi üçün həmyerlimiz dekabrın 14-də təsəlliverici görüşə çıxacaq.

Beka Kandelaki (130 kq) debütdə son Avropa çempionuyla qarşılaşsa da, Rumıniya idmançısı üzərində əzmkar qələbə qazanıb. 1/4 finalda Almaniya təmsilçisinə cəmi 1 dəqiqə 14 saniyə ərzində "tuşe" ilə qalib gələn millimizin üzvü yarımfinala yüksəlib. Ancaq finalın bir addımlığında Türkiyə idmançısıyla bacarmayan Beka dekabrın 14-də bürünc medal üçün mübarizə aparacaq.

Bu çəkilərdə medal qarşılaşmaları sabah Bakı vaxtı ilə saat 21:00-da başlayacaq.

Qeyd edək ki, digər yunan-Roma güləşçilərimizdən Eldəniz Əzizli (55 kq) də bürünc medal uğrunda yarışacaq. İslambek Dadov (67 kq) isə final döyüşünə çıxacaq. Hər iki medal qarşılaşması bu gün olacaq. 

60 kq
1/8 final: Nihat Məmmədli – Viktor Çiobanu (Moldova) 0:7

63 kq
1/8 final: Taleh Məmmədov – Aleksey Masik (Ukrayna) 9:1
1/4 final: Taleh Məmmədov - Jambolat Lokyayev (Rusiya) 0:2
Təsəlliverici görüş: Taleh Məmmədov - Mateuş Şevçuk (Polşa)

130 kq
1/8 final: Beka Kandelaki – Alin Kiurariu (Rumıniya) 3:1
1/4 final: Beka Kandelaki - Eduard Popp (Aımaniya) 4:0 (tuşe)
1/2 final: Beka Kandelaki - Osman Yıldırım (Türkiyə) 1:9
Bürünc medal görüşü: Beka Kandelaki - Rafal Krayevski (Polşa) / Hemza Haloui (Əlcəzair)