“Champions Chess Tour” çərçivəsində “Opera Euro Rapid” turnirinə start verilib. 

Apasport.az saytının məlumatına görə, mükafat fondu 100 min ABŞ dolları olan yarışın ilk günündə 5 tur oynanılıb. 

Azərbaycan şahmatçısı Teymur Rəcəbov keçirdiyi 5 görüşün heç birində məğlubiyyət acısı yaşamayıb. Sem Şenklendə (ABŞ) qalib gələn qrossmeyster Mattias Blyubaum (Almaniya), Lenye Dominqes (ABŞ), Yan Kşiştof Duda (Polşa) və Aleksandr Qrişukla (Rusiya) heç-heçə edib. 

Beləliklə, Teymur günü 3 xalla başa vurub və 4-6-cı yerlərə şərikdir. Turnir cədvəlinə həmyerlimizdən 1 xal çox toplayan Maqnus Karlsen (Norveç) başçılıq edir. Uesli So (ABŞ) və Yan Nepomnyaşi (Rusiya) isə 3,5 xala malikdir.

Turnirin ikinci günündə Aniş Giri (Niderland), Yan Nepomnyaşi (Rusiya), Hikaru Nakamura (ABŞ), Vidit Qudjrati (Hindistan) və Danil Dubov (Rusiya) təmsilçimizə rəqib olacaq. Dairəvi sistemlə keçirilən turnirin ilkin mərhələsinin son günündə - fevralın 8-də Rəcəbov Din Liren (Çin), Maqnus Karlsen (Norveç), Maksim Vaşye-Laqrav (Fransa), Uesli So (ABŞ) və Levon Aronyanla (Ermənistan) qarşılaşacaq.

Qeyd edək ki, yarışda 16 şahmatçı üç gün ərzində dairəvi sistemlə mübarizə apardıqdan sonra pley-offa 8 vəsiqənin sahibini müəyyənləşdirəcək. Turnirə fevralın 14-də yekun vurulacaq.
 

• Güllə atıcılığı üzrə Azərbaycan birinciliyinin qalibləri müəyyənləşib
• Azərbaycanın trek yığması Avropa çempionatında iştirak edəcək
• Şose velosipedi üzrə ölkə çempionatının qalibləri müəyyənləşib
• Balaheydər Kərimov triatlon üzrə Dünya Kubokunda hakimlik edən ilk azərbaycanlı olub
• Azərbaycanın deflimpiya üzrə üzgüçülük millisinin baş məşqçisi bəlli olub