Azərbaycanın iki güləşçisi Macarıstanın paytaxtı Budapeştdə keçirilən reytinq turnirində mükafatçılar sırasına düşüb.
Apasport.az xəbər verir ki, yarışın üçüncü günündə yunan-Roma güləşi üzrə millinin 5 üzvü xalçaya çıxıb.
Ruslan Nurullayev (72 kq) qazaxıstanlı Daniyar Kalenova 5:1 hesabıyla qalib gəlsə də, 1/4 finalda gürcüstanlı Yuri Lomadzeyə müqavimət göstərə bilməyib – 0:10. Təsəlliverici görüşdə norveçli Juan Aakı (6:4) yolundan kənarlaşdıran Ruslan bürünc medal uğrunda qarşılaşmada gürcüstanlı Giorgi Çxikvadzeyə heç bir şans tanımayıb – 9:0.
Gücünü yuxarı çəkidə sınayan Həsrət Cəfərov (72 kq) yarımfinaladək serbiyalı dünya çempionu Ali Arsalanla (2:1) qazaxıstanlı Merey Maulitkanova (5:3) qalib gəlib. Özbəkistanlı Abdulla Aliyevə 3:5 hesabıyla məğlub olan Həsrət biləyindəki zədəyə görə üçüncü yer uğrunda görüşə çıxmayıb.
İslam Abbasov (87 kq) ilk mərhələdə macarıstanlı İstvan Takaçı 3:1 hesabıyla üstələyib. 1/8 final görüşü erkən başa çatıb. Niderlandlı Marsel Sterkenburq zədələndiyi üçün İslam növbəti mərhələyə adlayıb. Norveçli Eksos Mukubunu ilk xal prinsipinə əsasən (1:1) mübarizədən kənarlaşdıran Abbasov yarımfinalda macarıstanlı David Losonçiyə uduzub – 0:4. İslam bürünc medal uğrunda görüşdə serbiyalı Avropa çempionu Aleksandr Komarovdan güclü olub – 5:2.
Beka Kandelaki (130 kq) koreyalı Seunqçan Liyə tam üstünlüklə (9:0) qalib gəlsə də, 1/4 finalda macarıstanlı Dariuş Vittekə sonuncu xal prinsipinə əsasən (3:3) məğlub olubsa, zədələndiyi üçün macarıstanlı Koppani Lasloyla təsəlliverici görüşə çıxmayıb.
Onunla eyni çəkidə yer alan Sərxan Məmmədov ABŞ güləşçilərini – Aden Attao (9:0) və Kurtni Frimanı (4:3) mübarizədən kənarlaşdıraraq yarımfinala yüksəlib. Finalın bir addımlığında macarıstanlı Dariuş Vittekə “tuş”la məğlub olan Sərxan bürünc medal uğrunda görüşdə macarıstanlı Koppani Lasloya minimal fərqlə (1:2) uduzub.
Beləliklə, yunan-Roma güləşçilərimiz reytinq turnirinə 2 bürünc medalla start verib.
Oxşar xəbərlər
Ana səhifə
Bütün xəbərlər