Natalya Məmmədovadan yubiley üçün fantastik göstərici

19.12.2012 - 10:01

Azərbaycan millisinin voleybolçusu Natalya Məmmədova “Omiçka”nın heyətində Rusiya Superliqasında növbəti oyununa çıxıb. Apasport.az saytının məlumatına görə, hücumçumuz “Ufimokça”ya qarşı baş tutan görüşün qəhrəmanı olub.

O, 3:2 (19:25, 25:22, 26:28, 25:19, 15:9) hesabı ilə qalib gəldikləri qarşılaşmada nə az, nə çox – 45 xal (!) toplayıb. Bu qələbə isə “Omiçka” üçün xüsusi əhəmiyyət daşıyıb.

Belə ki, Məmmədovanın pay sahibi olduğu qalibiyyət Omsk təmsilçisinin tarixinə düşüb. Onlar Superliqada 50-ci ev matçında 80-cı qələbələrini qazanıblar.

Qeyd edək ki, “Omiçka” qalib gələrək, xalının sayını 15-ə çatdırsa da, yenə 6-cı pillədə qalıb.