“Rabitə” sabah ardıcıl 6-cı çempionluğunu rəsmiləşdirə bilər

16.04.2013 - 15:05

Sabah Super Liqada XXV turun oyunları keçiriləcək. Apasport.az saytının məlumatına görə, autsayder “Lokomotiv Biləcəri”nin istirahət edəcəyi turda Azərbaycan çempionunun adına aydınlıq gələ bilər.

Çempionun vaxtından 3 tur əvvəl müəyyənləşməsi daha çox günün ikinci - “İqtisadçı” – “Rabitə” görüşündən asılıdır. Belə ki, matçda Marçello Abbondanzanın yetirmələri istənilən hesabla qalib gələrlərsə və ya 2:3 hesabı ilə belə uduzarlarsa ardıcıl 6-cı çempionluğunu bayram edəcəklər. Çünki “Rabitə” aktivinə daha 1 xal yazacağı halda əzəli rəqibi “Azərreyl” üçün də əlçatmaz olacaq. Artıq digər rəqiblərini xeyli arxada qoymaqla ən azı ikinci yeri özü üçün təmin edən “Rabitə”yə çatmağa nəzəri şanslar yalnız Aleksandr Çervyakovun komandasında qalıb.

Lakin “İqtisadçı”ya da qələbə hava-su kimi lazımdır. Hesabat turunda “Rabitə”nin 3 xal qazanmasından sonra çempionluq şansını itirən universitet komandası xal qazanmayacağı halda 2-ci olmaq şansını da çətinə salacaq.

“Rabitə” bu matça artıq çempion kimi də çıxa bilər. Nə qədər inandırıcı görünməsə də, “Telekom”un “Azərreyl”dən alacağı 1 xal sonuncuların qızıl medal ümidlərini dəfn edəcək. Belə olan halda “Rabitə” xal qazanmamaqla da, Super Liqanın qalibi olacaq. Əslində isə XXV turun ilk görüşündə “Azərreyl”in “Telekom”a 1 setdə məğlub olacağı gözlənilmir. Çünki onlar hələ debütanta 1 hissə belə uduzmayıblar.

Günə isə “Bakı-Azəryol” – “Lokomotiv” qarşılaşması ilə yekun vurulacaq. Ancaq nəzəri cəhətdən ilk “üçlüy”ə düşmək şansı olan klubların duelində “Lokomotiv” üstün sayılır. Birinci 3 dövrədəki kimi “dəmiryolçular”ın yenə 3 xal qazanacaqları proqnozlaşdırılır.

17 aprel
XXV tur

15:00. “AZƏRREYL” – “TELEKOM”
İlk oyun: “Telekom” – “Azərreyl” - 0:3 (17:25, 19:25, 12:25)
İkinci oyun: “Azərreyl” – “Telekom” - 3:0 (28:26, 25:19, 25:19)
Üçüncü oyun: “Telekom” – “Azərreyl” - 0:3 (9:25; 19:25, 23:25)

17:00. “İQTİSADÇI” – “RABİTƏ”
İlk oyun: “Rabitə” – “İqtisadçı” - 3:1 (25:15, 24:26, 26:24, 26:24)
İkinci oyun: “İqtisadçı” – “Rabitə” - 3:2 (26:24, 25:18, 29:31, 20:25, 17:15)
Üçüncü oyun: “Rabitə” – “İqtisadçı” - 3:0 (25:14, 25:21, 25:23)

19:00. “BAKI-AZƏRYOL” – “LOKOMOTIV”
İlk oyun: “Lokomotiv” – “Bakı-Azəryol” - 3:1 (25:14, 26:28, 25:15, 25:19)
İkinci oyun: “Bakı-Azəryol” – “Lokomotiv” - 1:3 (19:25, 19:25, 25:18, 18:25)
Üçüncü oyun: “Lokomotiv” – “Bakı-Azəryol” - 3:1(21:25, 25:17, 25:22, 25:17)

1	Rabitə	20	18	2	57-13	1734-1361	55
2	İqtisadçı	21	15	6	51-25	1776-1500	45
3	Azərreyl	20	14	6	47-22	1628-1444	43
4	Lokomotiv	20	12	8	44-31	1697-1579	35
5	Bakı-Azəryol	21	10	11	36-38	1627-1631	29
6	Telekom	21	2	19	7-57	1138-1555	6
7	Lokomotiv-Biləcəri	21	1	20	5-61	1094-1625	3