ABŞ yığması Azərbaycanla görüşə gələ bilmədi

20.06.2013 - 11:42

Qadın voleybolçulardan ibarət Azərbaycan millisinin Qazaxıstanda qatılacağı beynəlxalq turnirin iştirakçılarının siyahısında dəyişiklik olub. Apasport.az saytının məlumatına görə, ABŞ-ın tələbələr yığması iyunun 24-də Pavlodarda start götürəcək Nursultan Nazarbayevin şərəfinə keçiriləcək yarışa gələ bilməyəcək. Buna səbəb amerikalıların səfərlə bağlı sənədləri qaydasına vaxtında sala bilməmələri olub.

Beləliklə, turnirdə 6 komanda mübarizə aparacaq. Bunlar Faiq Qarayevin yetirmələri ilə yanaşı, Qazaxıstanın əsas və ikinci yığması, Belarus millisi, Rusiyanın “Uraloçka” və Çinin “Lyaonin” klublarıdır.

Qeyd edək ki, 29-da başa çatacaq yarışdan daha öncə Ukrayna millisi imtina etmişdi. Onlar bunu Avro-2013-ə hazırlıqla əlaqələndirmişdi.