Qadın voleybolçulardan ibarət Xorvatiya millisi sentyabrın 6-14-də Almaniya və İsveçrədə keçirəcək Avropa çempionatı üçün yekun heyətini açıqlayıb. Apasport.az saytının məlumatına görə, Azərbaycan yığması ilə eyni qrupda yer alan komandanın baş məşqçisi İqor Lovrinov Drezdenə aparacağı oyunçuları müəyyənləşdirib.

O, Sloveniyada təlim-məşq toplanışının son mərhələsinin gedişində yetirmələrindən ikisini – Antoniya Kaleb və Marina Miletiçi evlərinə yola salıb. Ardınca isə heyəti açıqlayan Lovrinov kapitan sarğısını yenidən Popoviçin daşıyacağını bildirib. Beləliklə, xorvatların “12-liyi” aşağıdakı kimidir:

Toppaylayıcılar: Ana Qrbaç, Bernarda Brciç
Hücumçular: Sanya Popoviç, Senna Usiç-Yoquniça, Mira Topiç, Mia Jerkov, Yelena Alajbeq
Blokçular: Maya Polyak, Bernarda Çutuk, İvana Miloş, Samanta Fabris
Libero: Martina Maleviç

Bu voleybolçulardan isə Miloş Azərbaycan idmansevərləri üçün yaxşı tanışdır. “İqtisadçı” ilə Super Liqanın bürünc medalını qazanan xorvat “Lokomotiv”lə “Çelenc Cup”ı başı üzərinə qaldırıb.

Qeyd edək ki, xorvatlardan öncə Rusiya da C qrupunun oyunları baş tutacaq Drezdenə aparacağı heyəti açıqlayıb. Onlardan fərqli, Azərbaycan və Belarus hələ “12-liyi” müəyyənləşdirməyib.

• Yığmamızdan qələbə ilə start
• III MDB Oyunları: Voleybol yarışlarının təqvimi açıqlanıb
• Voleybol üzrə Yüksək Liqaların yeni mövsümünün püşkü atılıb - FOTO
• Bakı təmsilçisindən yeni transfer
• “Murov Az Terminal"da yeni müqavilə