“Qarabağ” avrokubokların 2023/24 mövsümündə ilk dəfə meydanı qol vurmadan tərk edib.
Apasport.az xəbər verir ki, Ağdam klubunun qol seriyası Avropa Liqasının “Bayer”lə görüşündə qırılıb.
Qurban Qurbanovun komandası qrup mərhələsinin IV turunun Bakıdakı matçında 0:1 hesabı ilə uduzub. Bunadək qarşısıalınmaz “Qarabağ” ardıcıl 11 oyunda qol sevinci yaşayıb.
Çempionlar Liqasının “Linkoln” (2:1, 4:0) və “Rakuv”la (2:3, 1:1) qarşılaşmalarında başlayan bu uğurlu seriya Avropa Liqasında da davam edib. Qurban Qurbanovun yetirmələri öncə HİK (2:1, 2:1) və “Olimpiya” (2:0, 1:1), qrupda isə “Molde” (1:0), “Hekken” (1:0) və “Bayer”in (1:5) qapısına yol tapıb.
Komanda keçirdiyi 11 görüşdə 19 qola imza atıb. “Qarabağ” sonuncu dəfə ötən mövsümün “Gent”lə oyunundan (0:1) qolsuz ayrılmışdı.
Qeyd edək ki, ardıcıl 11 matçda fərqlənən “Qarabağ”ın bu göstəricisi Azərbaycan klublarının avrokuboklardakı rekordudur. Bunadək ən yüksək göstərici ardıcıl 10 görüşə bərabər idi.
Oxşar xəbərlər
Ana səhifə
Bütün xəbərlər
Hesabım