"Qarabağ"ın baş məşqçisi Qurban Qurbanov "Frayburq"la UEFA Avropa Liqasının qrup mərhələsinin ilk tur oyunu üçün Almaniyaya yollanmamışdan əvvəl Heydər Əliyev Beynəlxalq Aeroportunda jurnalistlərə açıqlama verib.
Apasport.az saytının məlumatına görə, 50 yaşlı mütəxəssis oyun ərəfəsində istək və həvəsin böyük olduğunu deyib:
"Bundesliqanın hazırkı liderinə qarşı oynayacağıq. Komandada istək və həvəs böyük böyükdür. Çünki indiyədək qrup mərhələsində iştirak etmək üçün çox əziyyət çəkilib. Əlbəttə, istərdik ki, Çempionlar Liqasının qrup mərhələsində oynayaq. Bundan ötrü oyundan-oyuna qarşımıza hədəf qoyurduq. Lakin alınmadı. Dəfələrlə demişəm ki, qrup mərhələsində oynamaq böyük təcrübədir. Bu, həm də futbolçularımın daha da inkişaf etmələri baxımından sevindiricidir.
Rəqiblərimiz nə qədər güclü olsalar da, meydanı mübarizəsiz tərk etmək istəmirik. Oyun gedə-gedə hansısa addımlar, yəqin ki, atılacaq. Rəqibi yaxından tanımaq üçün gərək ona qarşı mübarizə aparasan. Futbolçularımın ən azı yaxşı oyuna hazır olduqlarına inanıram".
Heyətlə bağlı ciddi problemlərinin olmadığını deyən Qurbanov kapitan Maksim Medvedevin durumunu normal dəyərləndirib: "Maksim komanda ilə tam məşqlərə başlayıb. Artıq son məşqlərimizin hamısında iştirak edib. Əsas heyətdə olmaya bilər. Lakin get-gedə komandanın bütün məşqlərinə, yükləmələrinə və oyunlarına hazır olmaqdadır. Ondan zamanı gəldiyində yararlanmağa çalışacağıq".
Qeyd edək ki, sentyabrın 8-də Frayburq şəhərindəki "Europa-Park" stadionunda keçiriləcək oyun Bakı vaxtı ilə saat 23:00-da başlayacaq (fanat.az).
Oxşar xəbərlər
Ana səhifə
Bütün xəbərlər
Hesabım