“Kəpəz”in xorvatiyalı qapıçısı Mario Mustapiçin apasport.az saytına müsahibəsi
- "Kəpəz" Premyer Liqada qalmağı bacardı. Məqsədinizə çatdığınızı demək olar?
- Artıq çempionat başa çatıb və indi mövsümdə keçirdiyimiz performansa baxıram. Həqiqətən yaxşı futbol nümayiş etdirdik və bu, nəticə verdi. Buna görə də heç bir şübhə və problem olmadan liqada qaldıq. Bu, qarşımıza qoyulan əsas məqsəd idi.
- Əslində, daha tez oyunlara çıxmalıydın. Lakin klub səni sifariş edə bilmədi. “Kəpəz”dəki performansını necə dəyərləndirirsən?
- Bəli, doğrudur, ilk dəfə “Kəpəz”ə gələndə bəzi problemlərə görə məni qeydiyyatdan keçirə bilmədilər. Ona görə də, evə qayıtmalı oldum. Amma qışda Antalyada mövsümöncəsi hazırlıq zamanı komandanın düşərgəsindəydim.
- Səncə, nəyə görə "Kəpəz"də əsas qapıçı ola bilmədin? Bəzən sən oynayırdın, bəzən Orxan Sadıqlı...
- Sonda oynadığım 9 oyundan tam razı qala bilmirəm. Lakin bu 9 oyunda biz cəmi 2 oyunda uduzduq, ona görə də hesab edirəm ki, bu, yaxşı statistikadır. Çünki xüsusilə turnir cədvəlinin aşağı pillələrində idik. Düşünürəm ki, zaman keçdikcə yaxşılaşırdım. Ona görə də inkişaf edə bilərəm. İndi bəzi yeni şeylərə uyğunlaşmalı olduğum bu keçid dövrünü geridə qoydum. Ümid edirəm ki, hər şey düzgün şəkildə gedəcək.
- Səni yeni mövsümdə də "Kəpəz"də görəcəyik? Yoxsa, başqa komandaya keçmək ehtimalın var?
- Gələcəyimlə bağlı məsələyə toxunsaq, yaxşı istirahət etmək üçün bir neçə gün vaxt ayırmalıyam. Bundan sonra nəyin daha yaxşı olduğunu görüb qərar verməli olacam. Oynamaq istəyirəm və yalnız vacib məsələ budur. Bu, hər bir futbolçunun düşüncə tərzidir.
- "Kəpəz" son matçlarını Gəncədə deyil, Qəbələdə oynayırdı. Bu, komandanın nəticəsinə necə təsir edirdi?
- Qəbələ stadionu həqiqətən yaxşıdır. Amma bizim evimiz deyil. Məncə, Gəncədə oynasaydıq, daha çox xal qazanardıq. Xüsusən də öz stadionumuzda azarkeşlərimizin önündə əldə etdiyimiz nəticələrə baxanda, bunu demək olur. Əminəm ki, hər bir oyunçu hər həftə avtobusda uzun yol getməkdən yorulur, amma işlər belə idi və biz buna təsir edə bilməzdik.
- Azərbaycan Premyer Liqası barədə fikrin necədir və diqqətini daha çox nə çəkdi?
- Premyer Liqa həqiqətən də yaxşı səviyyədədir. Sona qədər maraqlı idi və həqiqətən də rəqabətli liqadır. Yaxşı stadionlarda oynamağı xoşlayıram, ona görə də bu, məni çox qane etdi. Çempion “Qarabağ” Avropa yarışlarında yaxşı futbol nümayiş etdirən komandadır. Ona görə də nəticələri öz keyfiyyətini göstərir.
- Gəncədə yaşamağa öyrəşə bilmişdin?
- Gəncəni Zaqreblə müqayisə etmək çətindir. Mədəniyyət kimi bir çox fərq var. Amma Gəncədə yaşamışam və deyə bilərəm ki, ora çox gözəl idi. Uyğunlaşmaq üçün bir neçə vaxt lazımdır, amma orada özümü yaxşı hiss edirdim. İnsanlar mənə qarşı yaxşı davranırdılar. Ona görə də, özümü Gəncədə xoşbəxt hiss edirdim.
Oxşar xəbərlər
Ana səhifə
Bütün xəbərlər
Hesabım