Yay Olimpiya Oyunlarının boks yarışlarının proqramında dəyişiklik təsdiqlənib. 

Apasport.az saytının məlumatına görə, bu barədə qərarı Beynəlxalq Olimpiya Komitəsinin İcraiyyə Komitəsi verib.

Yeni qərara əsasən, 2024-cü ildə Fransanın paytaxtı Parisdə təşkil olunacaq Oyunların proqramında çəki dərəcələri müəyyənləşib. Növbəti Olimpiadada kişi boksçular 8 deyil, 7 – 51 kq, 57 kq, 63,5 kq, 71 kq, 80 kq, 92 kq, +92 kq çəki dərəcələrində qüvvəsini sınayacaqlar. Əvəzində qadın idmançılarda 1 çəki dərəcəsi artırılaraq, 6-ya çatdırılıb. Onlar Paris-2024-də 50 kq, 54 kq, 57 kq, 60 kq, 66 kq, 75 kq çəki dərəcələrində mübarizə aparacaqlar. 

Nəticədə kişilər kimi, qadın idmançılar da Oyunlarda 124 boksçu ilə təmsil olunacaqlar. Bununla da boksun tarixində ilk dəfə gender bərabərliyi təmin olunub. 

Fransa paytaxtında medal dəstlərinin ümumi sayında isə dəyişiklik edilməyib. Ümumilikdə 13 dəst mükafat sahibini tapacaq.

Qeyd edək ki, Paris Olimpiadası 2024-cü il iyulun 26-da start götürüb, avqustun 11-də başa çatacaq. 
 

• Belajdi Pusi: "Keçən mövsümlə müqayisədə daha yaxşıyıq" - Müsahibə
• “Qarabağ” “Neftçi”ni darmadağın etdi - YENİLƏNİB
• “El Klasiko” onu “yandırdı” - 833 min 334 dollarlıq məğlubiyyət
• "Fənərbaxça"lı Avroliqa tarixinə düşdü
• Qurban Qurbanov: “Futbolun gözəlliyi budur ki, son saniyələrdə qol olur”