Moskva. Mehman Süleymanov – APA-Sport. Futbol üzrə Azərbaycan yığmasının hücumçusu Daniel Axtyamovun şərəfini qoruduğu Rusiyanın “Torpedo” klubu öz meydanında uğursuz oyunlar seriyasını davam etdirir. “APA-Sport” agentliyinin məlumatına görə, ölkə çempionatının birinci divizionunda mübarizə aparan Moskva təmsilçisi “Baltika”nın ardınca, “Rostov” klubuna da 0:2 hesabı ilə uduzub. Ardıcıl üçüncü dəfə əsas heyətdə yer alan D.Axtyamov 28-ci dəqiqədə, “Torpedo” hesabda 0:2 geri olarkən əvəzlənib. Cari çempionatda öz meydanında qələbə qazana bilməyən moskvalılar 4 görüşdən 3-də məğlubiyyətlə üzləşiblər. Nəticədə “Torpedo” 8 turdan sonra 7 xalla turnir cədvəlində 22 komanda arasında 19-cu pillədə qərarlaşıb. Paytaxt klubunun uğursuz çıxışında ciddi maliyyə böhranı əsas səbəb kimi göstərilir.
Qeyd edək ki, “Torpedo” 23 yaşlı D.Axtyamovu üç ay öncə, yeni mövsümə hazırlıq zamanı transfer edib.