“Neftçi” – “Xəzər-Lənkəran” matçını 94 min tamaşaçı izləyib

08.05.2008 - 17:18

Üç il əvvəlki həmin matçda Zaur Tağızadənin iki qolu ilə qalib gələn meydan sahibləri tamaşaçı sayında ölkə rekordunu yeniləmişdi. Maraqlıdır ki, sonradan müəyyənləşən yeni rekord da bu komandaların görüşünə təsadüf edib. Ümumiyyətlə, Azərbaycan Premyer Liqası tarixində yalnız bu iki komandanın oyunları ən azı 20 min azarkeşin toplandığı stadionlarda keçirilib. Üç dəfə 20 min həddini aşan “Neftçi” - “Xəzər-Lənkəran” derbisini, ümumilikdə 94 min seyrçi izləyib. Bu qədər tamaşaçını 8 matça yığan rəqiblərin qarşıdurmasında flaqmanın üstünlüyü aşkardır. Bakılılar 5, lənkəranlılar 1 qələbə qazanıbsa, 2 dəfə bərabərlik qeydə alınıb. Maraqlıdır ki, son heç-heçə də Ağasəlim Mircavadovun ukraynalı həmkarı ilə oyununa təsadüf edib. İki il əvvəl “Neftçi”də çalışan mütəxəssis Viktor Pasulkonun yetirmələrinin Bakıdan yeganə xalını aparmağa mane ola bilməmişdisə, indi bu stadiona qonaq kimi gələcək. A.Mircavadov ukraynalı Anatoli Demyanenkoya uduzmamaqla, rəqibini həmyerlisinin uğurunu təkrarlaya bilər. Lənkəranlıların 61 yalı baş məşqçisi əvvəlki 8 qarşılaşmanın hamısında iştirak edib. “Neftçi”də lənkəranlılarla ilk və son matçda heç-heçə edən mütəxəssis ardıcıl 3 qələbə qazana bilmişdi. Əks düşərgədə ilk matçdakı qələbədən sonra isə A.Mircavadov iki məğlubiyyəti sıralayıb. Azərbaycana dəvət olunan ilk əcnəbi hakim də məhz “Neftçi” - “Xəzər-Lənkəran” oyununa təyin olunub. Üç il əvvəl Gəncədə keçirilən “Qızıl oyun”un hakimi olan Karlo Bertolini həmin oyunda bakılıların, həm də Ağasəlim Mircavadovun qələbəsini qeydə almışdı.

tarix	oyun	hesab	tamaşaçı
08.12.2004	“Xəzər-Lənkəran” – “Neftçi”	1:1	5000
11.05.2005	“Neftçi” - “Xəzər-Lənkəran”	2:1	21000
10.06.2005	“Neftçi” - “Xəzər-Lənkəran”	2:1	25000 (Gəncədə)
18.12.2005	“Xəzər-Lənkəran” – “Neftçi”	0:1	2500
30.05.2006	“Neftçi” - “Xəzər-Lənkəran”	2:2	500
11.08.2006	“Xəzər-Lənkəran” – “Neftçi”	2:1	11000
16.02.2007	“Neftçi” - “Xəzər-Lənkəran”	1:0	25000
10.11.2007	“Xəzər-Lənkəran” – “Neftçi”	0:1	4000