Bakı. Mehman Süleymanov - APA-Sport. Ramin Musayevin “Neftçi” klubunun vitse-prezidenti postundan uzaqlaşdırılması reallaşır. “APA-Sport” agentliyinin məlumatına görə, yaxın bir həftə ərzində Azərbaycan Peşəkar Futbol Liqasının prezidentliyinə keçiriləcək seçkidə R.Musayev qalib gələcək. Onun hazırda “Neftçi”də tutduğu vəzifəyə isə klubun icraçı-direktoru İlqar Quluzadə təyin olunacaq. İ.Quluzadə “APA-Sport”a açıqlamasında hadisələri qabaqlamağı məqsədəuyğun saymayıb. O, vitse-prezident postuna təyinatının hələ reallaşmadığını bildirib: “Hələlik bu yöndə real heç nə yoxdur. Ortada konkret nəsə olduqdan sonra bu haqda danışmağa dəyər. Necə deyərlər, “arxı keçməmiş hop deməzlər”. Klubumuzun prezidenti Əkbər Hacıyevlə vitse-prezident postuna təyinatımla bağlı görüşüm, söhbətim olmayıb. Hansısa posta təklif aldıqdan sonra istər-istəməz buna öz münasibətini bildirməlisən”.