Bakı - APA-Sport. Dünya futbolunun canlı əfsanəsi Dieqo Armando Maradona Argentina yığmasının baş məşqçisi olmaq istəyir. “APA-Sport”un məlumatına görə, dünya çempionu bu arzusunu Argentina radiosuna müsahibəsi zamanı söyləyib.

“Həqiqətən də milli komandanı çalışdırmaq niyyətindəyəm. Bu vəzifəni tutmağı indiyədək belə güclü arzulamamışdım. Yığmaya baş məşqçilik etməyə və bütün məsuliyyəti öz üzərimə götürməyə hazıram” - deyə Maradona vurğulayıb.

Ötən həftə dünya çempionatının seçmə mərhələsi çərçivəsində səfərdə Çiliyə məğlubiyyətdən (0:1) dərhal sonra istefa vermiş Alfio Bazilenin yerinə 3 namizəd var. Bunlar Migel Anhel Russo, Serjio Batista ve Dieqo Simeonedir. Argentina Futbol Federasiyası yekun qərarını oktyabrın 27-də açıqlayacaq.

Qeyd edək ki, peşəkar futbolçu karyerasını 1997-ci ildə başa vurmuş Maradona demək olar, məşqçi fəaliyyəti göstərməyib. 47 yaşlı futbol veteranı yalnız Argentinanın 2 klubunda qısa müddətə çalışıb.

• Alonso "Real"a qayıtmağa yaxındır
• Kvaratsxeliya İspaniya yolunda
• “Yuventus” Poqbanın müqaviləsini ləğv edəcək
• Salah bu şərtlə "Liverpul"da qalacaq
• "Arsenal" və "Liverpul" 100 milyon avroluq oyunçu üçün mübarizə aparacaq