Rekordlardan doymayan mütəxəssis

13.10.2010 - 14:06

Azərbaycan millisinin Avro-2012-nin seçmə mərhələsi çərçivəsində Türkiyəyə qarşı keçirdiyi görüş rekordlarla zəngin olub. Apasport.az saytının məlumatına görə, yığmamızın almaniyalı çalışdırıcısı Berti Foqts daha 4 rekorda adını yazdırıb. O, indi 3 yeni rekord müəyyənləşdirməklə yanaşı, daha bir göstəricidə ən yüksək nəticəyə şərikdir.

Foqts millimizlə seçmə oyunlarında 1-dən artıq (yəni iki) qələbə qazanan ilk futbol mütəxəssisidir. İndiyədək o, hərəyə 1 uğuru olan 6 məşqçidən biri idi.

Foqts Azərbaycan yığmasının baş məşqçisi kimi seçmə mərhələlərdə hamıdan çox xal toplayıb. Almaniyalı indiyədək İqor Ponomaryov və Şahin Diniyevlə eyni sayda 5 xal toplamışdısa, artıq onları 3 xal geridə qoyub.

Komandamız hansısa çalışdırıcının rəhbərliyi altında seçmə mərhələlərdə 5-dən çox qol vurmamışdı. Rəşad Sadıqovun Türkiyə yığmasının qapısından keçirdiyi top almaniyalının baş məşqçiliyi dövründə qeydə alınan 6-cı qol idi. Bunadək Foqts, Əsgər Abdullayev, Şahin Diniyev və Əhməd Ələsgərov hərəyə 5 qola sevinmişdilər.

Türkiyə ilə görüş, həm də Foqtsun rəhbərliyi altında keçirdiyimiz 13-cü seçmə oyun idi. Bu göstəricidə almaniyalı Vaqif Sadıqovun vahid liderliyinə son qoyub, ona şərik oldu.

Azərbaycan milli komandasının seçmə mərhələ oyunlarındakı baş məşqçiləri

	Baş məşqçi	O	Q	H	M	TF	X
1	Berti Foqts	13	2	2	9	6-23	8
2	İqr Ponomaryov	10	1	2	7	4-17	5
3	Şahin Diniyev	10	1	2	7	5-25	5
4	Kazbek Tuayev	5	1	1	3	1-10	4
5	Əsgər Abdullayev	6	1	1	4	5-15	4
6	Əhməd Ələsgərov	7	1	1	5	5-17	4
7	Karlos Alberto Torres	7	0	2	5	1-17	1
8	Vaqif Sadıqov	13	0	1	12	3-32	1
9	Qyoko Hacıyevski	2	0	0	2	1-3	0
10	Ağasəlim Mircavadov	8	0	0	8	2-27	0